首屆J League回顧:巨星雲集開創盛世

Chris的角球生物 於 13/04/2020 發表 收藏文章
原創文章,歡迎轉載並標明出處

Facebook專頁: https://www.facebook.com/Chris的角球生物-111089946977797/
圖片來源:https://bit.ly/2V0wIVO

睇到上次寫日本國家隊嘅「多哈悲劇」有好多人留意,今次就寫下J League點樣開啟日本邁向足球強國之路。

首先講下成立J League嘅理念同方針。第一,提升日本足球水平及普及足球運動。第二,振興運動文化及協助國民身心得到全面發展。第三,提升日本與國際間的交流。睇下而家日本熱愛足球,得到國際關注嘅情況,就知道J League絕對完成呢三個目標啦。

1965年至1992年,日本足球聯賽(JSL)一直係全國業餘足球嘅頂級聯賽。雖然當時日本嘅龍頭企業(例:三菱、東芝、讀賣新聞)都有派隊參賽,但人氣依然不如其他運動,例如棒球同埋賽馬。係1980年代後期,日本足協好想打破困境,於是嘗試在部份比賽開放觀眾免費入場。適逢當時嘅FIFA主席Ramón Díaz希望有亞洲國家可以主辦世界盃,同時研究日本可以主辦嘅可行性。係1988年同89年,JSL強化委員會兩度向足協提交報告書。1990年,JSL嘅球隊可以開始申請加入J League。1991年情人節,首屆J League參賽球隊名單公開,包括9支JSL球隊同埋新成立嘅清水心跳。

因為要過渡新舊聯賽,足協舉辦第一屆聯賽杯,作為J League前哨戰,當時川崎讀賣1-0戰勝清水心跳後捧盃。先講下首屆J League賽制,整個賽季分為兩個賽期,每人有18場主客場雙循環系列比賽。J League成立初期,為咗吸引多d球迷,增加比賽刺激度,每場比賽都必須分出勝負。同時因為呢個原因,聯賽並冇採用積分制,而係用勝利次數決定排名。

1993年5月15日,改變日本足球命運嘅J League揭幕戰喺東京國立競技場開戰,由川崎綠茵對戰橫濱水手,觀眾人數高達59,626。第19分鐘,川崎綠茵嘅荷蘭外援Henny Meijer 一腳重炮世界波成為載入史冊嘅入球,不過係下半場,橫濱水手嘅巴西外援Everton Nogueira同埋前阿根廷國腳Ramón Díaz炮製兩個入球,最終反勝當屆冠軍2比1。5月16日,巴西傳奇Zico率領鹿島鹿角係主場大勝名古屋鯨魚5比0,交出J League史上首個帽子戲法嘅精彩表演。
J League十支球隊揭幕戰嘅所有入球精華片段
影片來源:https://www.youtube.com/watch?v=aFp84q7amOM
J League首個帽子戲法:巴西傳奇Zico幫助鹿島鹿角大勝名古屋鯨魚5比0
影片來源:https://www.youtube.com/watch?v=2ZC_T9hGsDI

上半賽季,鹿島鹿角以13勝5負嘅成績奪冠。下半賽季,由三浦知良帶領嘅川崎綠茵成績更加亮眼,18場入面贏16場,自然奪得下半賽季嘅冠軍。兩隊踢總決賽,最終由川崎綠茵奪得全年總冠軍。
Kashima Antlers 0-2 Verdy Kawasaki | 1993/94 Throwback | Championship Final 1st Leg
影片來源:https://www.youtube.com/watch?v=_mzM1YzksMk
Verdy Kawasaki 1-1 Kashima Antlers | 1993/94 Throwback | Championship Final 2nd Leg
影片來源:https://www.youtube.com/watch?v=lNTl_Srmsos

首屆J League嘅最佳十一人,全數由賽季總成績排前4嘅球隊包攬:川崎綠茵、鹿島鹿角、清水心跳、橫濱水手。除咗外援,入選嘅球員基本上之後都入選過日本國家隊,包括係1998年世界盃擔任隊長嘅井原正巳。至於個人獎項方面,三浦知良成為實至名歸嘅MVP。

雖然J League成立初期加盟嘅巨星好多,而且有d已經算係過氣,不過日本足協嘅改革令J League最終冇扼殺本土球員嘅成長空間。歐美巨星固然可以增加聯賽號召力,同埋提升競技水平,不過身價膨脹會威脅球隊生存。1998年,日本足協出手大幅壓低球員收入,以及建立升降級制度。隨後面臨亞洲金融風暴衝擊,J League上座率大幅降低,要直到日韓兩國主辦世界盃,上座率先重新攀升。
2013年J League 20周年有紀錄片系列
影片來源:https://www.youtube.com/watch?v=qh71oT1STXU

J League令足球喺日本唔再只係運動,一家大細都鍾意睇,可以令球員實現夢想,可以令球迷透過支持球隊搵到歸屬感,正正係令日本足球有可持續發展嘅堅實基石。

多得日本足協嘅長遠目光,仲有唔同企業、球隊嘅通力合作,J League先至可以係二十年內就成長為「亞洲第一大聯賽」。期待J League可以繼續出產更多頂級日本國腳,獻上更多精彩刺激嘅比賽!

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→