從悲劇中覺醒:日本差1分鐘就晉身1994年世界盃

Chris的角球生物 於 06/04/2020 發表 收藏文章
原創文章,歡迎轉載並標明出處

Facebook專頁: https://www.facebook.com/Chris的角球生物-111089946977797/

日本足球目前係亞洲頭號勁旅之一,不過上世紀日本隊都經歷過唔少挫折。1994年發生嘅「多哈悲劇」,令佢地痛定思痛,思考日本係亞洲嘅實力定位,激勵佢地重新出發,4年後終於第一次晉身世界盃決賽週。

當時嘅亞洲區外圍賽只有兩圈,係第一圈30隊被分成6個小組,只有小組首名球隊先可以晉級第二圈。係小組賽最後一場比賽之前,日本雖然排係榜首,但同沙地阿拉伯同分,南韓、伊拉克同伊朗都只係落後一分,仍然有機會後來居上,所以日本隊唔可以大意,只有贏波先可以確定晉級
為左公平起見,最終輪每場比賽當然要同時進行。1993年10月28日,日本大量民眾係屋企同大型廣場睇電視直播,期望1993年正式開踢嘅J League可以幫助國家隊昂首挺進世界盃。果種緊張同興奮嘅心情,就係源自佢地對自己國家嘅熱愛。
日本民眾觀看比賽直播嘅過程同反應
影片來源:https://www.youtube.com/watch?v=3bEP2Y9cAyw

係多哈呢個中立場,與伊拉克同屬西亞嘅氣候環境令日本比伊國難d適應。日本另外仲有一d隱憂。追朔番去同年4月尾至5月初,日本隊係阿聯酋踢完4場密集賽程嘅世界盃外圍賽,隨即就返國踢第一屆J League。因為係第二圈外圍賽開始之前有調整期,係9月頭J league已經進行27場比賽,身心俱疲嘅情況令佢地最終面臨「絕平」嘅慘劇

開賽第5分鐘,目前53歲仲踢J League嘅前鋒三浦知良接應隊友勁射中楣彈出嘅波,門前埋伏頭槌破網。下半場初段,日本隊後衞爭頂失敗,被效力卡塔爾聯賽嘅Radha Shenaishil躺射死角,抨平比分。隨後伊拉克發動一輪猛攻,角球開到好準迫使日本隊係門線解圍,之後又比佢地前鋒連過幾人,好彩對住空門只係射中側網。第69分鐘,中山雅史嘅入球幫日本隊重燃希望。佢係禁區頂,無人壓迫嘅情況下,趕係門將接實個波之前射門。當然,伊拉克中堅冇動作,好可能係因為佢地覺得中山雅史越左位。

呢場比賽場地同之前4場唔同,草皮令日本隊唔太適應,難以組織順暢嘅攻勢。全隊都好希望比賽快d完結,有d仲不停望住個鐘。第80分鐘,日本隊荷蘭藉教練換人,換入武田修宏,可惜表現平庸,賽後被抨擊係敗筆之一。身為前鋒,佢係18場比賽入面只係入過1球,入球效率又真係幾低。唔明教練點解用佢換走入球功臣中山雅史,係好正常嘅事。第90分鐘,日本隊球員出現明顯疲態,可能心諗宣布贏波只係時間問題,冇諗過真係會比對手迫和。佢地開個短角球,然後傳向細禁區頂,比Jaffar Omran魚躍飛頂,頂向遠柱入波。成班後衞根本冇力頂,守門員反應不及,失波之後簡直難以置信,未吹完場哨已經癱坐。
圖片來源:https://miro.medium.com/max/800/1*1lxeVDod_j_NZNBEQd7Mtw.jpeg
4年後,經歷悲劇嘅主角之一,三浦知良終於成功帶領球隊,闖入1998年法國世界盃,但莫名其妙被教練踢出球員名單,成為當時日本體育界嘅頭條,亦令佢遺憾地冇參加過全何世界盃賽事。另一位主角中山雅史嘅國家隊命運就截然不同,佢成為首位喺世界盃入球嘅日本球員,亦有份參與2002年日韓世界盃。

呢場慘劇,令日本足球覺醒,唔再因為啱啱有職業聯賽就自視過高,腳踏實地咁強化聯賽,推廣基層足球文化,令日本湧現更多少年天才,最終長期強化國家隊戰力。南韓因為伊拉克嘅補時入球,得以反超日本前往1994年世界盃,令兩國日後對戰充斥更多火藥味。雖然冇人想專登重提慘劇,不過,向來有話題嘅足球更加好睇,唔係咩?

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→