《歐聯首勝全取三分 成功零封不失球更顯珍貴︱車路士對AC米蘭歐聯賽後感》

BluexLion車迷手記 於 07/10/2022 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


相信賽前無人預視到哩一場小組觸目大戰會以大勝作結,車路士喺主場以3-0擊敗有基奧特、湯姆利兩位前車舊將在陣既AC米蘭,雖然過程中缺乏大上大落既刺激畫面,形勢上亦有啲一面倒加上作客球員既個別犯錯造成大勝結果,不過對於一眾以往食開「救心」既車迷黎講,一場低調而且不失球既勝仗經已係近期既最大安慰。

喺賽前記招都預計高列巴尼會以正選姿態上場,尤其佢對意甲老對手既AC米蘭並唔陌生,防線上樸達選用佢再加上施華同科芬拿為三中堅,左右兩邊翼衛依然維持捷維爾以及列斯占士為正選,中場方面就用上路夫斯捷克接替有小傷既佐真奴,配合高華錫握守中路,而前線三人就收起左夏維斯,將蒙特推上一格搭奧巴美揚同史達寧為三攻堅,由上場既433陣式回復番藍軍以往常用既343陣式,可見得樸達係有因應對手而作出變化同試驗,盡可能利用執教首期哩幾場賽事為球隊發挖更多可能性。


相反AC米蘭既傷兵問題就顯得十分嚴重,基本上前中後三線連同門將都有傷兵問題所困擾,加上作客舟車勞頓,戰術同形勢上都未有比到主隊既車路士太多壓力,只要藍軍球員企啱個位無乜太大犯錯的話,白衫球員就無乜太多板斧進行突破同提速,而後備席箱亦未有另類選擇可以做到更多變化,令樸達更容易地只針對對方左路既拉斐爾里奧進行防守,就能瓦解絕大部份攻勢同威脅。

相比於杜曹執教時同樣既343陣式,樸達更著重球員間互動走位所帶動出黎既效果,無論皮球於三線任何位置,持球球員大部份時間都會同身旁兩名隊友形成「小三角」企位,帶動皮球即使向前抑或回後時都能夠更為順暢而且穩定地保持控球,同時喺位置上球員亦可以自由流動,例如路夫斯捷克可作為前線一員進行衝擊,令對手難以只透過針對個別球員既賽前部署完事,相對杜曹較為公式化既進攻套路,樸達哩一套會較為靈活多變。


而同時有兩項針對性部署喺今場波睇到,首先係角球攻勢上有預先計劃以施華作為進攻第一點,多下傳送都可能令後者取得直接攻門既機會,更成功演化成科芬拿為藍軍攻入首個入球;而喺三中堅既陣式運用上,除左兩邊翼衛壓上之外,入波既科芬拿都被准許參與更多既進攻職責,直接持球推進都令對手防不勝防,雖然今場波既效果未必理想,加上同拉斐爾里奧碰撞後受傷需要養傷一段時間,不過未來日子相信樸達喺科芬拿既運用上會更為倚重,佢既衝擊力同速度都係防線同戰術上既另一度板斧。

一場不失球既勝仗為球隊注入信心,兩日後將會喺主場迎戰主帥剛下課既狼隊,加上有迪亞高哥斯達回歸,將會係另一場硬仗。


文章發表時間 : 7/10/2022 14:35
文章最後更新時間 : 7/10/2022 14:35

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  AC米蘭  

留言


請按此登錄後留言。未成為會員? 立即註冊
    快捷鍵:←
    快捷鍵:→