《一紅經已直判死刑?期望過高的落差?︱干拿加拉加的辯護與平反》

BluexLion車迷手記 於 30/08/2022 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


長時間打少一人,戰術角度就無乜太多野講,反而想講下加拉加...

連續兩張黃牌都係犯同一個錯,賽後佢亦就自己既草率令球隊陷入險境向隊友道歉,唔少球迷都認為杜曹安排佢打個位未係球員最合適擅長既位置而引致失誤,其實要分番開兩件事黎睇,位置上即使哩個位未必啱你打,但佢所犯既錯都係一啲臨場判斷同決定既錯誤,就算加拉加果刻係打前鋒而作出哩兩個犯規都一樣被兩黃一紅,同打既位置係兩件事黎。

之前都未有著墨太多喺哩位青訓中場身上,藉着今次機會都想分享多啲關於佢既睇法,勤力同百分百投入賽事既態度可以話毋庸置疑,每次落到場都見到佢完全付出所有唔會錫身,哩啲都係依加陣中球員少有既元素,而特質上加拉加都係主打引球推進以及由Middle Third到Final Third既周邊工作,包括第一點反搶、輸送助攻同處理攻門,如果比較有相近特質既高華錫的話,加拉加喺Final Third既表現會比起前者優勝,反而喺小範圍技術、覆蓋面積同防守意識方面高華錫就會較好,個人技術亦比較細膩。


根據343雙中場陣式的話,高華錫既特質的確會比起加拉加更切合球隊既需求,相反如果要發揮出後者既長處就需要將佢既位置推近對手禁區,但兩者之間既特質同位置其實唔存在衝突,如果轉陣至433擔任三中場其一的話加拉加係會有較好表現,只係喺343雙中場時無高華錫咁全面,但不能完全否定球員既作用,一切在於教練既戰術需要同中場配搭能否互補。

盡管加拉加以一張紅牌差點被加上「罪人」之名,但年輕球員係要給予時間同犯錯機會,總唔能夠因為一次嚴重失誤而貿然選擇放棄,更何況喺加拉加身上睇到既拼搏同衝勁都係陣中少有的,肢體語言經已反映出球員對足球既熱誠,哩啲都係值得球迷比耐性落去既原因。


文章發表時間 : 30/8/2022 13:55
文章最後更新時間 : 30/8/2022 13:55

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : [url=https://www.facebook.com/bluexlion/]https://www.facebook.com/bluexlion/[/url
標籤: 車路士  干拿加拉加  

留言


請按此登錄後留言。未成為會員? 立即註冊
    快捷鍵:←
    快捷鍵:→