《「尚有」不足 卻比下有餘 林伯特的第一季成績表》

BluexLion車迷手記 於 16/08/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


「尚有」不足,卻比下有餘,足以形容到林伯特所帶領車路士既第一個球季,當然以成績上黎講佢已經到達合格以上水平,保持前四完成賽季以及足總盃亞軍,相信無人會喺季初果陣時估到車路士完季係會拎到哩個成績,以哩位只喺打比郡獲得一年經驗既新晉教頭黎講絕對係得到唔錯既評級,一齊回顧一下佢喺今季所面對既困境同進程。

陣中關鍵球員以及貴為神射手既夏薩特離隊,無疑會令人聯想起C朗拿度離開皇馬後球隊面對進攻乏力既境況,加上車路士受轉會禁令所影響,季初林伯特上任時所面對既處境同困難可以話係近年以黎前所未有咁複雜,唯一方法就只能摸著石頭過河,喺原有班底之下尋找出路,但藍軍近年喺陣容上經歷過干地同沙利兩任教頭南轅北轍既執教風格過後,除左鋒線老化問題之外,隊內亦因換帥而儲落一批不合用既球員喺員,再加上中場結構等問題一直延續未有解決...

如果本著舊有班底去完成一整賽季的話,再尋求向上突破空間實在非常有限,加上傷患以及體能未必足以應付多條戰線消耗,而林伯特選擇以以老帶新作為今季大方向,過往藍軍青年梯隊都喺球壇上獲得唔錯既成績,但能夠真正晉身於一隊既球員卻屈指可數,喺轉會禁令下亦係一個好機會比到哩班年輕人去証明自己既能力,加上林伯特所組成既教練團隊之中有多位成員都對於青年軍球員相當熟悉,Jody Morris (摩利斯)同Joe Edwards兩位都曾經執教過藍軍青年梯隊,並同時提升艾巴咸、蒙特、湯姆利以及列斯占士四位加入一隊陣中。

喺戰術上林伯特繼續著重於控傳為基礎,利用小組傳控於邊線發展,希望透過兩三腳快速短傳就能讓球員喺邊路進行突破,而同時將蒙特放置於核心地位,哩名上季曾經同林伯特一齊喺打比郡共事過既小將可以話係喺四位年輕球員之中得到最多機會既一位,無論係以翼鋒還是擔任中場位置蒙特都能為球隊注入活力,同時具備後上殺入禁區以及遠射能力亦彌補到近年黎車路士中場欠缺既元素,不過延伸出黎就係中場組合上既配搭...

林伯特喺整個賽季都試過唔同既中場組合,即使排除個別球員因傷患而缺陣既情況,佢依然都未有一套好確定性既中場正選名單,而同時喺組合上配搭不同類型既球員亦未有顯著既化學反應出現,反而睇到既係林伯特過度著重於透支簡迪既體能消耗,只要哩名法國冠軍級中場能夠上場的話都一定會用到足,亦令到佢既傷患開始與日俱增,哩一點絕對係有需要留意住。

至於喺防線上,開季時決意讓大衛雷斯離開而選擇相信陣中一眾缺乏太多實戰經驗既中堅們,而較為前輩級既魯迪加亦相對上出現較多個人失誤,令防線問題成為今季各人關注既地方,同時林伯特似乎未有太多念頭可以透過戰術結構既改造而為防線舒壓,無論係蘇馬還是基斯甸臣都未能給予大家信心,再加上死球防守漏洞,黎緊就只有透過買人以及加入新既訓練防守元素去尋求解決之道。

而喺前線進攻上,艾巴咸同基奧特可以話成為左今季既關鍵,兩人各自承接上下各半季既火力輸出,艾巴咸季初狀態火熱下一度令球迷們眼前一亮,而基奧特亦能把握得到前者受傷後既機會維持球隊進攻力度,配合埋佩利錫適應英超後支撐起球隊左路進攻,以及韋利安喺右路既推進,都足以勉強完成哩一個賽季,相信下季喺薛耶治以及添姆雲拿過盟後,加上球員再多一季時間融合之下能夠喺進攻層面上再有進一步提升。

結語 雖然球隊仍有唔少問題尚待尋求解決辦法,而林伯特亦喺多方面有進步空間,不過以第一季成績黎講相信球迷以至外界都表示滿意,而無論係高普還是哥迪奧拿接管利物浦同曼城初時都需要時間摸熟球隊,繼而循序漸進式革新以及改變當中內容,至少兩至三季時間先至會開始成形,同時管理層亦明顯對於林伯特有加以支援同保護,相信哩一點係近年黎少有既地方,亦意味住車路士正以一個正確既方向前進。



《原創文章 歡迎轉載 請列明出處 謝謝》
標籤: 車路士  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→