《車迷們有一種福氣 叫簡迪》

BluexLion車迷手記 於 27/11/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


唔經唔覺,簡迪加盟車路士都已經三季有多,而原來一直都無寫過關於佢既文章,自「小毒毒」加盟後一直都係藍軍不可或缺既球員,重要性甚至不下於夏薩特,而經歷過三任領隊既洗禮過後,簡迪喺隊中既角色同場上既職責一直在演變,可以話係一種能上既進化。

簡迪比起當季領隊干地喺更早時間加盟史丹福橋,策動是次轉會交易既係前任體育總監艾文拿路,相信好大原因係取決於哩位法國中場喺李斯特城期間驚人既表現,協助球隊以「奇蹟性」獲得應屆英超冠軍,而簡迪既加盟亦令當時唔少車迷回憶起馬基列尼及艾辛兩位前球員,同為黑人既簡迪同樣地以防中位置成名,而史丹福橋過往對於擔任防中既球員都有著一定「標誌性」,令車迷憧憬簡迪會得到名宿們既成就。

同時簡迪既加盟令當時仲喺隊中既馬迪有唔少束縛,當時干地利用343陣式為車路士及英超創造一道光境,但喺雙中場當中簡地被安排一個偏向防守性既角色,反而將馬迪推向較為前既位置,但後者個人黎講對於新角色既轉變似乎有點不滿,即使當季能夠成功爭取得到英超冠軍,但佢亦隨即接受摩連奴既邀請轉投曼聯,亦埋下干地被炒既伏線。

對於簡迪取代馬迪,無疑係一種提升,不過中場上既組合,始終難以依靠簡迪一人去承擔,要睇其他中場球員既組合性,而干地所收購既巴卡約高就未能乎合有關條件,雖然後場依然有簡迪去保護,但球隊喺中場既推動力方面實在有太大不足,球隊成績未如理想,而干地最終亦與管理層不歡而散,而車路士就搵黎同樣係意大利藉既沙利作新領隊。

沙利喺拿玻里年代其實都已經証明自己係一個偏向主動進攻既領隊,而同時佢亦帶黎左舊部佐真奴,後者主要負責喺中後場位置派波策動攻勢,亦都姐係同簡迪係完完全全唔同風格既防中,而沙利帶得佐真奴過黎,當然係會比番最擅長既位置佢打,而將過往專注於中後場負責掃蕩既簡迪,改變成為需要投入更多進攻工作、負責球隊中場推動既攻擊球員,亦組係由防中改成為類近Box to Box中場。

當然,外界對於沙利既改造意見聲不斷,但不容置疑既係簡迪喺場上既發展的確更加全面,所覆蓋既範圍已經唔係單單局防喺中後場,而係喺前鋒身後既區域經已作出第一步攔截,即使被對手略過亦可以跑動到後場參與防務,而同時簡迪亦會適時走入禁區作出接應,雖然未必算係話好好,不過佢的確比起以往入得更多波,而亦有為球隊搶到唔少關鍵分數。

即使林伯特上任後亦未有改變簡迪現有既踢法,繼續以前領隊沙利既安排作基礎藍本,不過法國人今年都二十有八,踢法上經常要喺場上奔跑走動無疑令身體會出現較多傷患,再加上改造後既簡迪負擔就更大,季初至今都一直斷斷續續咁上場,真係有必要鍚住用。球員上季經已成功續約,近日簡迪開腔指希望能夠於史丹福橋退役,此舉令唔少潛在買家好似巴黎聖日門等豪門球員心傷,老實說,以簡迪既個人能力絕對能夠再獲得進一步成就,不過佢選擇繼續留喺藍軍...

對於車路士同所有球迷黎講,係一種福氣...


文章發表時間 : 27/11/2019 11:55
文章最後更新時間 : 27/11/2019 11:55

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  簡迪  李斯特城  

留言


請按此登錄後留言。未成為會員? 立即註冊
    快捷鍵:←
    快捷鍵:→