《藍軍廿五年黎最年輕陣容 諾域治對車路士賽後分析》

BluexLion車迷手記 於 25/08/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


無諗過今場波會係車路士近廿五年最年輕既陣容黎,平均年齡就只有廿四歲零二百零八天,不過青春風暴就賭上大起大落既畫面,絲絲入扣既進攻配上如入無人之境既防守,實在令球迷們心驚膽跳。

簡迪喺賽前經已確定受傷,而柏度熱身時亦同樣受傷,巴克利臨危受命以正選出場出任攻中位置,將蒙特安排到左邊路,繼續以前場小組進攻模式去爭取入球機會。今場睇到球員們喺小範圍傳送同入稧時機都開始愈見進步,尤其係蒙特入既果一球,而今場MVP既艾巴咸亦一洗頹風,兩個入球都顯示到過往缺少既把握力,亦睇得到林伯特依然對佢加以信任。

艾巴咸對比於基奧特同巴舒亞伊,喺功能上會較為全面,擁有基佬既支點分波能力,同時亦比後者有更強既衝擊力,再加上能夠持球推進過一,哩幾點都比起巴舒亞伊優勝。另外想講一講巴克利,哩位英格蘭中場真係名符其實既「熱身賽之王」,一去到正式賽事表現就真係十分強差人意,交波唔到位都不在話下,仲要經常動作慢幾拍咁,幾次比人迫甩都慢條斯理咁回防,喺林伯特手下都幫唔到佢的話其實就真係要接受現實。

至於防守方面,第一個失波都無咩好講,比人喺禁區內多下短傳猜幾腳就射入,但第二球就真係要鬧,先有蘇馬跟甩對手,佢完全無留意到自己身後有人,到發現再追果下已經為時而晚,而同時佢既拍檔基斯甸臣包哂哩球越位,其實都唔係第一次發生比人突破越位入球既場面,始終佢地都無一個人肯做提搶指揮出聲既角色。

最後想講下,林伯特哩套戰術對於球員既體能消耗係相當相當之大,亦唔知係咪因為操練時比起以往既訓練量更多令好似簡迪咁都較易經常受傷, 而喺場上會見到上下半場球隊既表現都好兩極,上半場有氣有力果陣可以狂迫狂壓對手,但一到下半場過左六七十分鐘之後就開始無力回追,戰術執行力大大下降,而同時亦見唔少球員要彎腰抖氣,依加先去到開季第四場波 黎緊仲要開多幾條戰線對體能既付出就只會更大。

總結 大上大落既場面相信會係今季每場波都會見到,前線進攻套路逐漸成形,而適逢韋利安及奧岱開始復操,相信黎緊既進攻變化會更大,林伯特今季會依重艾巴咸為隊中第一射手,級數上雖然未算達標不過睇得到球員有比過力推動自己進步,至於後防,基斯甸臣同蘇馬就真係要夾多啲喇,至少防線喺防守時要成水平是基本吧!


文章發表時間 : 25/08/2019 09:50
文章最後更新時間 : 25/08/2019 09:50

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  諾域治  林伯特  艾巴咸  

留言


請按此登錄後留言。未成為會員? 立即註冊
    快捷鍵:←
    快捷鍵:→