托利斯主場倒戈 哥斯達為座上客 車路士重返歐聯的第一場硬仗

BluexLion車迷手記 於 27/09/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

車路士全隊在倫敦完成最後一節操練後經已啟程前往西班牙,備戰對馬德里體育會既歐聯分組賽第二輪既賽事,球隊上一輪以六比零大勝卡拉巴克,對手實力不屬高水平,所以今仗作客馬體會絕對係車路士今季重回歐聯遇到既第一場硬仗。干地會如何安排戰術及人員配置,一齊分析一下。
.圖片來源 : YouTube

遠到西班牙萬達大都會球場,雙方其實都各自有球員倒戈,車路士門將古圖爾斯曾在馬德里有一段唔錯既回憶,今季由皇馬來投既莫拉達更是馬體會青訓體系一員,而床單軍團均有前鋒費蘭度托利斯及左閘菲臘路爾斯曾為藍軍效力,至於剛剛官方公佈轉會既迪亞高哥斯達會為今場既座上客,眼見新舊東家立馬對決相信佢會成為鏡頭捕捉既場外主角。
.圖片來源 : 90Min

馬體會開季至今保持不敗成績,領隊施蒙尼如無意外將會繼續持442陣式,預測出場人腳會為門將奧比歷、左閘菲臘路爾斯、右閘桑法蘭、中堅為荷西基文尼斯伙拍高甸,中場核心會維持加比、高基、沙奧尼古斯、卡拉斯高,而前線基沙文必為正選,未知拍檔會係安祖哥利亞、韋圖、加美路還是費蘭度托利斯,小弟相信韋圖首發機會較大。
.圖片來源 : FOX Sports Asia

作客馬體會要全身而退其實是困難的,干地必先要穩固後防,門將古圖爾斯絕對係不二之選,而三後衛當中人有五位人選,最先於入十一人正選名單當中的相信會係大衛雷斯,巴西人在聯賽對阿仙奴領紅導致上場作客史篤城時不能上陣,今場體力充足定必正選上陣,位置上中堅中既另一人選基斯甸臣會先為後備,至於組合方面會係卡希爾加艾斯派古達,魯迪加搭艾斯派古達,還是卡希爾加魯迪加?

至於摩西斯係咪已經達到歐洲賽水平?理性分析下,右翼衛理應先用艾斯派古達,而後防雷斯拍檔為卡希爾及魯迪加,始終馬體會既進攻套路唔多,反而係翼衛位置上除左要照顧到對手中場外,亦需要提防左右閘球員桑法蘭及菲臘路爾斯,兩位後上前插既助攻能力絕不能看輕,選用防守意識較好既艾斯派古達代替摩西斯出任右翼衛較為合適。
.圖片來源 : Naij.com sports

左翼衛人選並唔多,馬高斯阿朗素理應繼續為正選,上仗對陣史篤城時後備換走保留體力為今場鋪路。到中場方面,唔少球迷會考究干地會選用雙中場還是三中場,小弟認為以依加車路士既人腳配置,雙中場會較為合適,主要原因係由於真禾特受傷仍未能為藍軍出戰(消息指出會在未來兩星期復出),如果選用三中場的話,簡迪、法比加斯、巴卡約高一同上場,後備席上根本沒有一個具質素既中場球員可以替補用途。
.圖片來源 : Saudi Gazette

其實直到真禾特復出之前,車路士中場既臨場調動同上季基本上無分別,正選維持兩人,由簡迪同巴卡約高出任,到下半場時換入法比加斯作變奏,以三中場維持球隊控制力,其實喺上場對陣史篤城時經已使用。維持哩個戰術安排同人腳配置喺依加既藍軍黎講已經係最為理想,今場就要睇下干地有冇突破性既戰術構思,否則貴為世界級教練施蒙尼基本上係「睇住黎食」。
.圖片來源 : Marca

到前線方面,賽前記者會干地已經百分百肯定夏薩特已經準備好為球隊再次在歐聯場上出戰,相信今場強強對碰正選機會相當之大,而另一邊路攻擊球員小弟認為柏度會較合適,唔比較各方面能力之下,單單睇近幾場表現柏度都比韋利安優勝,反而要留意既係西班牙人既體力未必足支撐完成九十分鐘賽事,哩個時候換入韋利安會係最好既時間。至於中鋒位置絕對係莫拉達無念,始終佢在效力皇馬時經已係老對手,而且過去已經証明莫拉達在歐聯賽場上都能夠交出服眾既表現。
.圖片來源 : POPULAR-world.com

整體實力上馬體會稍稍佔優,主要係正選球員已經夾慣夾熟,同時在主場之利以及往績之下,車路士要過哩關必定困難,哩場絕對係干地帶領既藍軍重回歐聯既第一場硬仗,究竟能否力保不失,今晚自有分曉。

文章最後更新時間 : 27/09/2017 13:15

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

留言


請按此登錄後留言。未成為會員? 立即註冊
  • OhMyGirl_Arin 於 27/09/2017 評論 NO. 1

    後衛最好都係魯迪格 雷斯 azp 之後中場簡迪拍巴卡約高 右翼衛出zappacosta好過啦

快捷鍵:←
快捷鍵:→