《魯迪加離隊在即 探討車路士其他後防成員的動態 是去?還是留?》

藍獅 於 25/12/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


多名車路士防守球員其實都將於黎緊既夏季完約,當中包括堤亞高施華、魯迪加、基斯甸臣以及隊長艾斯派古達,球會至今都只係成功與小將查禾查路巴續約,黎緊各個後防成員將會何去何從?今次將會為大家探討一下。

其實球會管理層一直都有喺防線上進行循序漸進既換班,大衛雷斯、魯迪加、基斯甸臣及蘇馬各自分佈於唔同年齡層,直到林伯特上任與雷斯鬧翻,再將魯迪加打入冷宮,而起用既一眾小將蘇馬、湯姆利等人亦難以委以重任,令防線既表現相當風聲鶴唳,不過自杜曹上任後將魯迪加解凍,球員亦馬上用表現証明自己為英超最佳中堅之一,加上堤亞高施華哩位世界級老手以及眾小將們上力既表現,使車路士既防線再次回復當年穩健堅固。

今季季初球隊一度與西維爾中堅觀迪既傳聞行得相當之近,主要原因相信係球會希望用佢能夠取代表現一直不穩既蘇馬,再加上觀迪喺年齡上更比後者年輕,誰不知西維爾反手加價令交易告吹過後,錯有錯著令機會落入小將查路巴手中,哩位藍軍青訓中堅亦把握得到上位機會打入杜曹名單之中,亦成為近期正選十一人之一,而球會選擇同查路巴續約絕對係對佢既表現給予肯定。

相關文章 : 《放棄收購觀迪 選擇相信自家青訓小將 他的名字叫查禾查路巴》

至於更為需要關注既其餘四位中堅,根據消息指球會近日經已重啟同基斯甸臣既續約談判,而球員亦多次向外界表示於史丹福橋過得相當開心,個人認為丹麥人留效機會相當之大,另外有傳球會有意同老將施華再續約多一年,希望佢能夠再喺倫敦過多一個球季直到2023年,哩位世界級中堅既表現相信眾車迷都有目共睹,即使年事已高但對於英超既高強度都應付自如,足以証明球員既職業態度同個人能力絕對係無容置疑。

而隊長艾斯派古達既情況就比較持觀望態度,佢既合約將於黎緊夏天到期而根據球會以往面對於年過三十既球員處理手法,相信最多都只係會續多一至兩年合約,好取決於隊長自己既取態會希望留喺球會效力直至退役年紀,還是到其他聯賽延續自己既職業生涯,雖然近日有傳巴塞隆拿向艾斯派古達招手,不過相信都係吹水新聞居多,尤其係巴塞依加處於重建階段自身問題相當多。

最後就到魯迪加,個人黎講對於佢既情況就係四位之中最唔樂觀既一個,雖然杜曹多次開腔指希望球員能夠繼續留效,但球會同德國中堅之間一直都未能就著新合約中既週薪同年期達成共識,而拜仁同皇馬都相當關注魯迪加既情況,如果喺冬季轉會窗過後都未有續約行動的話相信哩兩支列強好大機會會出手,而同時車路士方面都有傳開始部署搵新中堅既消息,預測魯迪加來季離隊他投既機會都相當之大。

相關文章 : 《職業生涯最後一份「大合約」 魯迪加續與不續的決擇》

估計喺球季完結前球會將會成功同基斯甸臣同施華續約,而隊長艾斯派古達既情況就要睇佢自己既取態,按情感而言相信留效多一個球季既機會都大,至於魯迪加既處境就不抱過份希望,反而更為關注球會喺新中堅收購既行動上或會更好,究竟會否重啟收購觀迪既談判,喺現今球壇好中堅難求既情況之下,就要睇球會喺巿場上既觸角同眼光了。


文章發表時間 : 25/12/2021 10:30
文章最後更新時間 : 25/12/2021 10:30

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→