《七個球員確診無前鋒用 六個後備有兩個龍門 執到一分都偷笑︱狼隊對車路士賽後感》

藍獅 於 21/12/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


唔講哩場波點解仲會繼續踢,當中原因究竟係車路士單方面遲申請還是賽會原因唔考究,淨係知今場波藍軍有七個球員確診,無正選前鋒可以用,後備出得六個球員仲要有兩個龍門,以結果論黎講今場波拎到一分和波兼終於可以不失球,再加無球員受傷,真係收貨偷笑。

今場波有簡迪同高華錫復出,就輸到佐真奴同路夫斯捷克確診,藍軍一隊一共有七名球員確診,再連同其他受傷球員,杜曹今場波都只能安排六位後備當中包括兩位門將;艾斯派古達、堤亞高施華以及魯迪加為三中堅,中場方面由小將查路巴伙拍簡迪,左右翼衛繼續由馬高斯阿朗素同列斯占士擔任,前線就安排左蒙特、薛耶治同佩利錫組成無鋒陣。

狼隊一貫今季風格,上半場先搶一段迫搶,到下半場轉為收後主力防守,同尾段換查奧爾出黎博下反擊,兩隊上半場其實互有攻守,雙方各搶一段場面各半,而藍喺半場尾段開始搶回優勢,半場出番黎換入沙奧尼古斯,喺簡迪既保護下沙奧既表現相對穩定,更而換入傷癒復出既高華錫取代薜耶治,鞏固中場加強控制及硬度,但奈何進攻板斧實在太少,只能依靠兩邊出波製造機會,但禁區內前點就只有佩利錫一人,面對住狼隊咁多高大硬淨中堅根本毫無任何優勢。

當然佩利錫喺前點都曾經製造過兩次比較到肉既機會,不過都被門將化解,再望一望車路士個後備席,基本上都無乜可以加強進攻既轉變元素喺度,相信杜曹既用意都係希望不失球為先,始終球隊近幾場波既失球數字都多不勝數,簡迪同高華錫既復出絕對係球隊既強心藥,希望喺中場球員陸續復出後球隊攻守兩端可以回復平衡。


文章發表時間 : 21/12/2021 12:30
文章最後更新時間 : 21/12/2021 12:30

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  狼隊  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→