《駕馭不起傳奇8號的8號 - 巴克利》

藍獅 於 24/05/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


每隊波著得起8號哩個號碼既球員,理應有番咁上下級數或者星味,而對於大部份車路士球迷黎講現任8號波衫既主人巴克利就似乎未能達到哩個水平,再加上傳奇名宿林伯特回歸執教,相信佢亦好想將再將巴克利既能力再進一步提升,但奈何球員資質有限,與其再花時間喺佢身上倒不如為8號球衣尋覓新主人。

巴克利同林伯特兩人同屬英籍,喺後者尚未退役成為主帥仲係球員年代時,兩者無論喺英超賽場還是國家隊層面,既是敵人亦是隊友,互相有一定程度認識,而林伯特喺今季亦多番強調巴克利喺陣中既重要性,對球員表現同能力亦表示肯定,不過對比於上季沙利執教時,哩位英格蘭中場喺今季既上陣時間經已被縮減唔少,主要原因係對比於巴克利,林伯特更相信佢既師弟蒙特。

其實早於林伯特仲係以球員身份效力車路士既時候,都經已傳出藍軍有意收購巴克利成為佢接班人,而當時後者又的確喺愛華頓既表現發揮得非常出色,奈何當時拖肥糖並無意放人,但由於球員既狀態回落得相當快,再加上一直受到傷患困擾,愛華頓亦無奈地於18年以1500萬鎊既低價將佢賣到史丹福橋,價錢上睇黎的確係一個相當超值既數字,但亦要睇球員自己能唔能夠打得出身價。

而巴克利喺藍軍首任合作既主帥干地之下,並無發揮得出預期既效果,而喺上季沙利執掌下,表現亦時好時壞,早已被冠名「熱身賽之鬼」既巴克利永遠喺季前都有亮眼既表現,但每當開季就一貫為人詬病既缺點,狀態飄忽不定,腳風順既時候可以連場入波擦靚數據,但亦可以一個黎個一百八十度既「施丹轉身」比幾場西波你嘆,而除左場內表現之外近年喺場外既操守亦唔見得好,醉酒搭的士無錢找數以及養傷期間比人見到赤裸上身去酒吧跳舞哩兩單野,相信都帶到比過往甚為檢點既林伯特帶領唔少壞印象。

相信路夫另一師弟路夫斯捷克復出會再將巴克利既上陣時間再進一步壓縮,甚至更有機會被賣走離開,而以球員既質素黎講,喺一啲英超中游球隊擔任核心位置絕對綽綽有餘,繼續留喺車路士之中就只能得到名利,但地位就喺不進則退之下被一眾小將所取代亦只會係時間問題。


文章發表時間 : 22/05/2019 11:55
文章最後更新時間 : 22/05/2019 11:55

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  巴克利  林伯特  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→