青春風暴係時候抬起頭來 把握今季最後兩場機會

藍獅 於 14/05/2017 發表 收藏文章
-請支持藍獅 Facebook專頁-
<歡迎轉載 請列明出處 謝謝>

慢慢長路既英超賽事已經步入尾聲,車路士亦成功作客擊敗西布朗後提早鎖定聯賽冠軍,接下來需要重點準備足總盃決賽對陣阿仙奴既賽事,而聯賽餘下兩場分別都係喺主場迎戰屈福特以及新特蘭,雖然只係例行公事,亦預測干地會安排一眾後備球員上陣,當中不乏新一代年輕球員,亦有久未露面既面孔。

<<巴舒亞伊>>
領頭羊一定係佢,近排最紅既主角,在上場聯賽攻入一球為車路士直接提早兩輪奪冠。一直被認為未適應英超節奏以及干地既打法,來季會遭清洗,但巴舒亞伊未有選擇舉白旗投降,反而不斷在訓練中裝備自己,而剛剛既入球亦係最好既証明,當然佢年紀尚輕偶有失誤,希望巴舒亞伊會好好利用黎緊兩場擔任正選箭頭,去証明自己絕對有力喺車路士爭取一席位。

<<艾基>>
季初外借轉會至般尼茅夫,及後開始被安排為後衛正選上陣,表現十分出色。到季中轉會窗因伊雲奴域離隊,被車路士回收己用,但一直只能待在後備席,什至有一半場數係連後備機會都無,機會寥寥可數。正當球迷有聲音指干地應給予更多機會哩位荷蘭新星時,被安排以正選姿態出戰熱刺穩定,表現令干地投下信任一票。能夠出任防中、後衛、邊路防守球員什至翼衛,相信頂替卡希爾成為左後衛機會較大。

<<蘇馬>>
自上年十二月左右傷癒後一直都未搵番最好狀態,即使後備上陣表現亦強差人意,更導致干地直接起用艾基作替補卡希爾人選出戰足總盃四強對熱刺既正選,而不是蘇馬,荷蘭人與法國人兩者在場上既表現高下立見。另一方面,有指蘇馬將會喺季後外借到其他球隊,以提升己身狀態,佢絕對係車路士未來重要一員,來季是去是留,相信等待哩兩場波完結後會有最終答案,而預計佢將會頂替艾斯派古達以右後衛身份出戰。

<<查路巴>>
係眾多位年青球員當中首名獲得上陣機會,司職中場中既查路巴,偏於防守端,適當時間會在對手禁區外施加遠射。由於正選三人地位無可動遙,所以只能喺一啲已經鎖定勝局既賽事上,以入替攻擊球員後備上陣。對比上下半季,在冬季轉會窗過後只獲得足總盃賽事作正選上陣機會,上陣機會較季初少。如無意外,黎緊哩兩場波有機會令干地轉陣三中場並成為其中一員,希望查路巴會繼續發揮出穩定既表現。

<<路夫斯捷克>>
由去季出任中場位置,到今季被轉型位邊路攻擊球員,相信干地睇到哩位英格蘭未來新星既潛能而作出定位上既轉變。過往被外界批評少於回防或跑動,出任攻擊位置後比擔任中場較少防務工作,放膽專注進攻,而球員無論盤球或者爆破,表現有板有眼,確實有點夏薩特既影子。可惜欠運至今尚未得到今季第一個入球,只交出兩個助攻,睇下黎緊哩兩場波可唔可以為佢開齋。

<<堅離地>>
相信好多球迷都唔記得左佢,什至有機會唔知佢係邊個。季初被外借到屈福特,只經過兩場後備一場入替過後就受傷患困擾,季中被退回到車路士繼續養傷,至今只獲得一場足總盃後備上陣機會。能夠擔任左邊路任何位置,主要偏好於進攻,但亦未得到干地給予機會。近日更被傳會在季後離隊他投,相信如果哩兩場都無機會上陣既話,將會跟傳聞所言離開藍橋。

<<比高域>>
似乎比高域既藍橋生涯已經進入尾聲,季中已經有傳聞指佢會離開,只因車路士未能及時在轉會窗完結前收購合適既副選門將,繼而將哩位波斯尼亞國門留下。今季比高域在各項賽事上陣只有七場,而表現令人信服,但一直成為古圖爾斯既後備,以佢當打之齡黎講絕對有力喺英超中游球隊成為主力,近期亦有表示季後會與球會相討去向,相信離隊機會都大,哩兩場波有機會成為佢藍橋生涯既結尾。

<<泰利>>
最後當然唔會少左隊長泰利,依加車路士已經鎖定英超冠軍,而干地先前亦有指出泰利較適合擔任三後衛中核心位置,正好機會比斷斷續續半傷中既大衛雷斯休息一下。同時正如林佰特所言,安排泰利出任埋黎緊哩兩場正選,戴上隊長臂章接受主場球迷們既掌聲,作為歡送道別令佢既藍橋生涯畫上完美句號。

雖然睇落只係兩場例行公事,但當中對每位上陣既球員都別有意義,不止是他們要珍惜,球迷們的你也要珍惜。...精華延伸閲讀二選一...如果有一次機會 你會再次上車嗎?施治...半改造下的半成品 馬迪...

<歡迎轉載 請列明出處 謝謝>
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
  • OhMyGirl_Arin
    OhMyGirl_Arin 於 14/05/2017 評論 NO. 1

    堅離地就算數啦 其他都可以試 希望泰利可以出多幾場

  • Leung Wai Kit Leung
    Leung Wai Kit Leung 於 14/05/2017 評論 NO. 2

    青年軍全出都無問題!
    冠軍己袋!

  • Dorian Shing
    Dorian Shing 於 14/05/2017 評論 NO. 3

    冇Musonda?

  • Wildpig Ivanlokvic
    Wildpig Ivanlokvic 於 14/05/2017 評論 NO. 4

    Aina 呢?

  • OhMyGirl_Arin
    OhMyGirl_Arin 於 15/05/2017 評論 NO. 5

    aina廢到根本唔會用 完全似打翼多過閘

  • Daniel Ngan
    Daniel Ngan 於 15/05/2017 評論 NO. 6

    路夫斯捷克一D都唔似H10
    佢打開cm,有D似馬迪就真

  • Andy Tang
    Andy Tang 於 16/05/2017 評論 NO. 7

    其實喺冠軍已袋嘅情況之下, 門將個辨可以畀2號門將甚至三號門將出嚟玩下。 隊長泰利可帶領全體青年軍出動。其他球員努力操fit去殺低阿仙奴給雲加一個教訓(主觀意願)

快捷鍵:←
快捷鍵:→