《離隊已成定局 韋利安將結束七年藍橋生涯黯然離開》

藍獅 於 08/08/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


賽季完結在即,車路士餘下歐聯戰線就完成今個賽季所有賽事正式收咧,同時英格蘭官方決定將於下個月開始新賽季,意味住球會需要馬不停蹄展開轉會籌備工作,除左要針對個別位置作出補充之外,亦要為部份將於今個賽季完約既球員定斷去留,其中韋利安既情況必然係最為大眾關注,但球會由開季至今一直無法與球員達成續約協議,相信巴西人離隊經已成為定局...

當中最傾唔埋冷既主因係雙方一直無法就住續約期達成一致協議,韋利安由始至終都希望能夠球會開出三年續約期作為佢喺史丹福橋既最後一份合約,而車路士方面就只能為年過三十球員額外地提供兩年合約作為條件,雙方各有理據但互無退讓空間,而其中球員本人因為家庭原因希望能夠定居於倫敦,意味住如果離開藍軍的話轉投同為倫敦球會將會係佢既首選,當中呼聲最大既定必係阿仙奴同熱刺哩兩支球隊。
據外界報導阿仙奴願意為韋利安開出三年合約,而人工上會比起現有藍軍所提供既週薪稍微下降,加上同屬同一經理人既同鄉大衛雷斯上季經已同為轉投至阿仙奴,相信喺各方面既條件之下與兵工廠簽約亦都只係時間問題;林伯特亦喺對拜仁賽前記招表示相當專重同理解球員既意向,雖然感到可惜但都已盡一切努力希望韋利安能夠留效,不過作為球迷黎講對於佢喺無聲無息之間經已完成為車路士既最後一場賽事實在感到非常可惜。

巴西人既離開同時衍生出延續問題,今季佢喺右路推進上既工作需要有球員接替,雖然球會經已收購能夠以右翼甚至中路應戰既薛耶治作補充,不過喺柏度同時間離隊之下球會係有必要收夠多一名翼鋒球員去接替韋利安既工作,再加上薛耶治同添姆雲拿係未打過英超擁有不確定性,而佩利錫經常受傷患困擾以及奧岱自上季續約後表現一直浮浮沉沉,同一時間面對住柏度以及韋利安兩位球隊老將離隊會難免會存在一輪動盪既機會。

不過上季都早已經歷過夏薩特離隊再加上轉會禁令而車路士都捱得過,相信林伯特自一年既成長後亦同樣地有能力解決固中問題,如何融合新球員以及微調戰術上既細節位定必係下季最先要解決既事,外界早前曾一度傳出車路士有意收購效力緊英冠賓福特既賓哈馬(Said Benrahma)作為接替韋利安既人選,此子同樣主打腳法細膩具備吸睛技術,不過個人認為翼鋒位置上實在太多同為技術型球員,相反好似韋利安哩類型主打推進作為賣點既先可以令球會人腳上更為全面,同時不同類型既球員亦可以豐富到領隊所構思既戰術藍圖。

不過無論點都好,都要感謝韋利安過去咁多年為車路士所作出既貢獻,雖然好大機會會喺場上成為敵人,都希望佢能夠喺新球會既球員黃昏生涯取得成功,時機上不合而離開亦唔代表他日不能重聚...

多謝你!黑世三...


文章發表時間 : 08/08/2020 12:00
文章最後更新時間 : 08/08/2020 12:00

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  韋利安  林伯特  阿仙奴  

留言


請按此登錄後留言。未成為會員? 立即註冊
    快捷鍵:←
    快捷鍵:→