《家有一老如有一寶 淺談老將們如何混合青春班成就今季車路士》

藍獅 於 05/08/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


每隊球隊之中定必有唔同年齡層既球員,有年過三十既老將亦有由青年軍提拔上黎一隊既新秀,而均衡既年齡層係可以令到一個球會有長遠而有利既發展,哩一點可以話係無容置疑,喺今季車路士大打「青春風暴」底下,亦不乏一眾老將輪流接力去支撐球會完成一整賽季,最終更以聯賽前四去完成沒有任何新收購既一年,以事後黎睇其實係無人會預計到哩個結果。

夏薩特離隊,林伯特走馬上任,加上受轉會禁令所影響,同時喺上季都經已出現唔少陣容上既問題,翼鋒老化問題都已經係近年需要解決既事,中場缺乏遠射及助攻力較強既球員現位於禁區頂位置,以及防線青黃不接,種種問題都係外界可預視得到林伯特需要接受既挑戰,亦因為咁而令大家都覺得車路士能夠以聯賽前六完成賽季的話都已經算係起額完成,未敢奢望有太多目標可以成功達到。

受制於人手所限,林伯特只能用盡陣中可用既人腳,季前熱身賽嘗試比個機會全隊球員都參與,希望從中再睇下有邊啲球員其實係合適切合到自己既戰術體系,最終一眾過往被外借既小將們包括艾巴咸、蒙特以及湯姆利分別都獲得留隊機會,而今季既發展亦係圍繞住「青春風暴」去建立,眾小將們喺上半季階段的確維持住唔錯既表現,艾巴咸同蒙特輪流爆發為球隊收獲唔少積分,相反去到下半季階段,可以話就由一眾老將們去承接住哩股走勢。

柏度、基奧特以及韋利安當中,今季最為受到林伯特重用既非後者莫屬,自季初傷癒復出後韋利安一直維持住正選位置,同簡迪一齊負責球隊右路推進既工作,即使年過三十無論喺速度同體能上都甚至可以話比一眾後生仔好,踢到八十幾九十分鐘依然有氣有力,哩頭喺後場見到佢逗得好深協防果頭已經見到佢直奔前場參與反擊,可以話係一個身體力行值得學習既人板示範,亦係林伯特咁則重於佢既原因之一。

相反柏度就較少獲得上陣機會,除左喺特質上未必有韋利安咁切合到林伯特既需要之外,哩位西班牙翼鋒上半季比較多受傷患困擾,不過又正正喺冬季轉會窗過後佩利錫、奧岱等人受傷時柏度又可以立即上陣,喺翼鋒位置缺乏人手時佢亦維持得到即戰力比到球隊,左右腳運用純熟以及衝擊力未有過份走樣底下繼續提供到邊線輸出,可以話非常難得。

至於基奧特既處境就更為匪夷所思,上半季上陣機會寥寥可數,正當為搶佔歐國盃一席位而選擇出走之時被林伯特剎停交易,當時基奧特亦非常尊重合約精神並無因而做任何傷害球會利益既行為,如果係較為年輕既球員相信都早以用罷操既方式要求球會放人,而正喺下半季時受惠於艾巴咸受傷,「銀河唯一」開始得到上陣機會,亦一步步得到林伯特既信任,再去到復賽後更成為球隊既正選,贏得一紙合約下季將會繼續留隊效力。

總括黎講今季車路士可以話係有一眾老將承接住「青春風暴」而維持球隊既成績,亦可以話令到林伯特知道點樣維持球隊喺一個賽季要應付咁多賽事中取得平衡,過份則重於年輕小將會較為起伏不定,相反只運用一眾老將的話又係喺體能同活力上出現問題,始終都需要喺兩者之間取得平衡至可以保持住應有既競爭力,亦相信下季所面對既挑戰係會更大。


文章發表時間 : 05/08/2020 11:25
文章最後更新時間 : 05/08/2020 11:25

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  基奧特  韋利安  柏度  林伯特  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→