《關於盧卡古的話 我想說的是...》

藍獅 於 18/06/2022 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


近排車路士既轉會消息中最為熱烘烘既定必係盧卡古想返國米哩一單,個人認為佢回歸都只係時間問題,畢竟杜曹經歷左一整季都搵唔到盧卡古喺陣中既定位,加上球員場外動作亦無必要繼續留佢喺度影響軍心,依加牌就已經攤左,相信杜曹同新老闆亦唔會強人所難,格硬留低佢亦都只會係三輸局面。

不過國米所提出既借用費定價似乎就惹黎唔少車迷不滿,覺得出手低劣什至以「乞衣」價錢黎形容,想講返句其實向來轉會巿場都係講供求,就好似巴卡約高咁買左返黎唔啱用借去AC米蘭又試過,返去摩納哥同拿玻里都試過,去到上季又再借返去AC米蘭都一直無比人買斷,巿場經已反映出球員既定價,老實講如果佢真係有其他更好既選擇的話你大可以唔借佢去意甲,你知我知佢都知完季係好大機會唔會比人買斷,但問題係除左意甲之外根本無其他球隊想要,哩個就係供求問題。

盧卡古既情況都一樣,上季車路士想買前鋒,選擇上有佢、夏蘭特同哈利簡尼,夏蘭特個目標一直都係皇馬、曼城,何況車路士都唔會負擔得起佢個人工同簽紙費,因為實在太天價;至於哈利簡尼,以我地同巿宿敵同利維之間既交情,加上就連曼城都買唔到佢更何況係交惡左多年既車路士?巿場上就只有盧卡古哩個選擇,而要國米放走當家射手就當然唔會肯平放比你,到今日睇返轉會巿場,盧卡古既選擇並唔多,拜仁即使放走利雲亦都唔見得會高價簽入佢,搵性價比更高既文尼仲好,選擇就只係得返國米,將心比己既然依加全世界都覺得盧卡古唔值哩個價又點解要國米出高價去回收你?更何況排除戰術效益,另一邊廂還有個可以免簽既戴巴拿都在等著。


只能夠講車路士經已將盧卡古哩單交易定性為失敗收購,而背後係無論球會高層、主教練杜曹以至球員本人都需要負起責任,依加新班主保里(Todd Boehly)上場定必想將損失減到最少,同時佢亦都需要時間審視返過去球會既轉會操作,始終車路士過去都買入唔少水貨,除左上面講既巴卡約高之外,真禾達、巴舒亞伊、巴巴拉文、迪保積治等,基本上一隻手都數唔晒,相反望下國際米蘭,喺前祖雲達斯CEO馬路達(Giuseppe Marotta)掌權之後投入到轉會巿場既操作,已經成功打破左祖雲達斯喺意甲既壟斷,每個轉會窗既操作都對症下藥令到陣容愈黎愈強,而車路士比起人地唔係無錢,但點解上季季中捷維爾經已提早收咧連買/借個好啲左閘返黎都咁難?又會係邊個環節出現既問題?留待空間比車迷們自己想像一下...


文章發表時間 : 18/6/2022 12:25
文章最後更新時間 : 18/6/2022 12:25

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 盧卡古  車路士  杜曹  國米  國際米蘭  

留言


請按此登錄後留言。未成為會員? 立即註冊
    快捷鍵:←
    快捷鍵:→