《車路士賽季總結丨比上有不足 比下又有餘》

藍獅 於 16/06/2022 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


賽季結束,又黎到做總結既時候,對比季初所希望車路士能達到既目標,似乎仲有一啲距離,的確果時預測球隊同樣以第三名完成賽季,不過目標都依然希望我地同曼城以及利物浦哩兩頭馬車既差距可以拉近一啲,可惜今季賽季反而仲比人拉得遠左,只收錄得超級盃以及世界冠軍球會盃兩項錦標,聯賽盃以及足總盃同樣輸比利物浦手上,不過車路士今季經歷過唔少高山低谷,最大影響定必係油王既離開,相信都係令季尾成績不穩既因素之一。

論聯賽成績,今季以74分完成賽季排聯賽第三,對比再上一個賽季以67完成排第四,只能夠講最多都係有積分上既小進步,而入球數字亦由58球躍升至76球,失球數字則未有太大變化,只由36球平穩地減至33球;數據上的確見到車路士喺今個賽季入多左波,不過喺分數上並無反映出有太大既提升,再睇埋和同輸既場次,就會發現藍軍只係比上個賽季輸少三場,但打和既場次反而仲多左一場,顯示出球隊依然缺少打破困局既手段。


杜曹喺季初決定收購盧卡古,相信目的都係為左令前線有穩定既入球數字,但睇番哩位比利時人喺全季聯賽既入球數字就只係得8個入球,連雙位數都未達標,實在對於球隊既入球數字無乜太大既支持,基本上佢係對唔番起自己既身價,當然除左球員本身既自身問題之外,杜曹自己亦有需要負起部份責任,戰術上並因應盧卡古而作出改變,發揮唔到佢可以為球隊提供得到其他既效益範疇,如果選擇喺戰術方向藍圖唔作出轉變的話,當初點解唔選擇留低基奧特重用夏維斯,而走去重金禮聘將盧卡古帶回史丹福橋呢?

而同樣地前線等人包括添姆雲拿、佩利錫及薛耶治等攻擊手都無法為球隊帶黎說服力,就只有蒙特有明顯進步為球隊喺聯賽取得入球同助攻雙雙佳績,夏維斯亦喺入球數字上亦有所進步提升,而其餘入球數字就由後防線所貢獻,包括施華、魯迪加、阿朗素等人都喺入球量上取得上升,其中列斯占士既表現更加可以話係相當亮眼,反映出球隊既總入球數字雖然有所提升,但並唔係完全由前線球員所帶黎,球隊依然缺少左一名穩定既入球收割者,同時喺面對密集時缺少左應有創造力為球隊打破僵局。


而除左喺聯賽之外既其他戰線,收錄得超級盃以及世界冠軍球會盃兩項錦標,反而喺本土盃賽上包括聯賽盃及足總盃都同敗於利物浦腳下,雖然陣容實力上我地同紅軍依然有所差距,不過以決賽一場波黎睇車路士既士氣同鬥心都不下於利物浦,能夠打到加時最後只係輸喺十二碼手上只能夠講欠運,當然喺一啲細節同臨場變動上可以做得更好,整體地黎講哩兩場決賽都未能捧盃而回實在係欠運同可惜。

再加上捷維爾提早收咧、盧卡古訪問事件、俄烏戰事迫使油王賣盤等事件,無論係場內場外都好難講成對球隊無影響,而感受最深既定必係杜曹一人,尤其係喺季尾時段球隊上下受賣盤消息所困擾,連場失分基本上屬球員心理影響大於教練戰術問題;以季前目標黎睇球隊的確未算得上完全達標,不過今季可以話係困難重重既一個賽季,能夠以第三名加上兩個奬盃都不能苛求更多。


展望下個賽季,球隊事事順利,重新上路吧!


文章發表時間 : 16/6/2022 12:45
文章最後更新時間 : 16/6/2022 12:45

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→