《小矮人大戰巨人國 車路士對西維爾歐聯賽後分析》

藍獅 於 22/10/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


歐聯戰線正式開始,車路士頭場遇上同組最惡搞對手歐霸之主西維爾,無論實力同質素都絕對不容忽視,亦同時令陣中一眾年輕人體驗不同聯賽風格既硬度,吸收歐戰經驗成長,雖然最終互交白卷摸和各得一分,不過以場面黎睇同賽前部署,相信哩個分數亦係林伯特所預期得到的。

正選十一名單當中中前場球員並無太變化,依然源用添姆雲拿作單箭頭,身後繼續由夏弗斯作支援,而左右兩翼亦係兼任既蒙特同上場正式復出既佩利錫,中場方面依然係簡迪配搭佐真奴哩對組合,反而後場變化就較大,堤亞高施華於國際賽休息過後復任正選,伙拍上場失誤既蘇馬為雙中堅,而尼爾斯占士亦頂替艾斯派古達為右閘正選,左閘方面就繼續源用捷維爾,至於文迪亦趕及傷癒復出,取代基柏為正選門將,而球隊陣式上依舊保持4231為主。

哩場絕對可以用一個「悶」字黎形容,尤其係凌晨時份睇直播既球迷相信都會比場波搞到昏昏欲睡,賽前都預期林伯特既部署會傾向保守,始終西維爾並唔係泛泛之輩,球員質素加上戰術體系既融合度甚至平起藍軍更高,加上我地後防依然交出「水兵鬥海軍」既表現,戰術上趨向較為保守係正路而理解的,而同時西維爾既踢法亦唔係太過進取,造成雙方都令場面變得悶局。

不過喺賽事進程中睇到,兩隊無論喺傳控同壓迫上都存在分野,明顯西維爾係技勝一籌,由後場組織以至小組式走位互傳都猜到好幾下,加上球速快傳得準,相反藍軍好多時猜唔夠幾腳就已經斷纜,再延伸出壓迫問題,基本上車路士既前場壓迫都係浪費體力徒勞無功,人地喺後場好幾下組織都經已突破到你所謂既逼搶,但相反當你控球時,人地既防守球員專注以釘人式進行防守,令到藍軍得到反擊既機會甚至連組織都少之又少,只能依靠對方後防球員犯錯至造成進攻機會。

話雖如此,添姆雲拿今場波亦都得到好幾個射門機會,可惜一一浪費,當中最主要原因除左係經常無望定目標就起腳之外,佢既first touch能力實在有好大進步空間,好幾下都控到離晒腳大力左,雖則上場對修咸頓時有下背向對手接應繼而立即轉身用速度爆過對手射入,不過今次對住西維爾就無咁容易比你行得通,尤其係西甲既中堅除左需要具備身體條件之外亦要同時注重技術根底,相對上比起英超黎講唔會咁易比你用到一啲小技術打到身後波。

至於最後想講一下身體對抗方面,都已經唔知由幾時開始,車路士既前場球員身形愈黎愈單薄,個個都玩技術流,今場波除左係得施華、蘇馬同簡迪叫做夠人撞下之外,勉強你都可以計埋夏弗斯既,其餘球員基本上都比西維爾屈身體質素,五五波之下野野都比人撞開搶波,就算你想屈返佢速度都見唔到有太大優勢,可見得對手又跑得又撞得,身體條件經已高下立見,就好似小矮人大戰巨人國一樣。

今場波正好係一次機會比林伯特同全隊得知自己喺歐聯之中處於邊個水平,能夠由少有機會中轉化成入球既成功率仍然不合格,如果想喺歐聯再進一步突破淘汱賽第一關的話實在有必要喺戰術同表現再有明顯提升,否則就只會原地踏步,黎緊週未就黎返英超大戰曼聯,亦係時候整合過往既經驗避免再度比人喺聯賽雙殺。


文章發表時間 : 22/10/2019 12:00
文章最後更新時間 : 22/10/2019 12:50

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  西維爾  歐聯  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→