《進攻係最好既防守? 般尼對車路士賽後分析》

藍獅 於 01/11/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


繼歐聯作客到俄羅斯大勝後,今場同樣需要以作客身份北上到摩亞球場挑戰般尼,正當大家都認為般尼會比到唔少苦楚藍軍既時候,誰不知清風送爽地亦同樣以大比數兼不失球之下乒取三分,不過如果你有睇足全場波的話都知道,其實車路士並唔算得上超水準表現,而係般尼既狀態同士氣真係愈打愈洩。

薛耶治經過左上場歐聯正式復出後,今場繼續右翼正選上陣可以話係意料之中,但可惜既係正當球迷們以為球隊前線終於可以齊人上陣之時,佩利錫正正喺哩個時候熱身受傷,由諗住輪休既添姆雲拿臨時頂替左翼角色,而箭頭位置就由艾巴咸擔任,至於中場位置上亦同樣有改變,源用上場下半時段時段夏弗斯與蒙特同場既安排,再配合簡迪以一個置中墜後既中場角色出現,後防線就繼續由輪休過後既堤亞高施華帶領,伙拍蘇馬以及尼爾斯占士以及捷維爾。

先宏觀地講下哩場波既形勢,老實講般尼比到車路士既壓力並唔多,可能你睇完之後會話「唔係喎我見佢地啲前場球員有向前迫架喎」,但事實係大多數都係做樣多過有實際用途,全部拍到埋身既時候後面無隊友跟實其他傳球路線,亦都即係無系統性既迫搶,變相姐係拉闊左個陣形繼而比到好多空間車路士去睇定黎傳,所以究竟係藍軍今場打得有進步左定只係比數上既假象黎?個人就偏向後者居多,至少可以講左參考價值唔算話好大,睇你點睇。

風格上林伯特繼續保持番穩定既控球速率,並無刻以推高行軍速度,感覺上反而係要求全隊睇定到位先好傳,盡可能以一啲交到腳既波為主,避免下下大起大落引致失位繼而陣式變形而製造危險鏡頭,而同時球員與球員之間既距離亦比起之前有所收窄,睇到整體連接上係有所提升;雖然球隊依然能夠保持不失,不過都有兩個防守位置都係要抽出黎講下,先講蘇馬,一個頭槌入球並不能成為遮醜布去掩蓋佢個人防守上既失誤,今場波自製兩下危險鏡頭,要不是文迪個「蜜月運」未過的話佢早已好似基柏咁被蘇馬既醫院波迫害。

另外就係尼爾斯占士,啲企位真係嚇死人,下下失完位靠速度同身形去嘗試番搶對手,但明顯喺般尼球員都有硬度之下無乜貼頭,令到球隊右路經常性出現「救心」鏡頭,好在有施華喺後面包下位出黎剎下波,後生仔好心唔好咁衝動下下上到咁前,比施華抖下啦好無;講完後防漏洞,就講番中前場,賽前見到夏弗斯拍蒙特哩個組合以為會好進取,點知打出黎又無想像中咁失衡,蒙特反而偏向做一個類似中場潤滑油既角色,時常回後同簡迪一齊前後夾擊對手,同時會參與進攻,跑上跑落既角色的確幾啱佢發揮,至少唔係繼續將佢放喺翼鋒位置上面先。

而艾巴咸感覺上亦比以往勤力,一黎可能添姆雲合黎左競爭大,難得有機會上陣當然要博盡,至於夏弗斯就無另外幾位同樣新加盟既球員咁亮眼,佢依然喺林伯特手下尋找緊最適合自己既風格,不過之前都有講到德國人真係要留意下自己喺中後場推波既位置,今場波至少有兩個鏡頭都係佢向後推時都非常牙煙;最後就到添姆雲拿同薛耶治,表現都唔需要多講,依加都只係等待時間過去令佢地幾位磨合從而提升合作性,喺依加防線感覺上趨向穩定之下,林伯特只需專注改善埋由守轉攻既細節,相信前面幾位喺「打天材波」之下都無乜太多煩惱。

至於最後補充多樣野,今場波般尼其實都走甩左好幾個犯規,當中含有十二碼同黃牌之嫌,只能夠講好在能夠大勝一場,否則哩三分都幾大機會凍過水。


文章發表時間 : 01/11/2019 14:05
文章最後更新時間 : 01/11/2019 14:05

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  般尼  英超  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→