《車路士賽季最佳球員 值得依靠的不射男 - 高華錫》

藍獅 於 06/09/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


每當賽季完結後各支球隊無論最終成績如何,都會各自舉行年度頒獎禮以表揚個別球員耀目既表現,但今年受到疫情所影響,車路士亦選擇取消有關頒獎禮轉為以網上形式公佈,唔單止失色不少,更重要既係有唔少球迷其實連有哩個一年一度既頒獎盛事都忽略左,因此特意寫一篇文章順帶回顧一下哩位車路士年度賽季最佳球員(Player of the Season award) - 高華錫。

睇返過去十年獲得哩個奬項既球員,無論係杜奧巴、馬達、夏薩特以及簡迪等人,全部都成功帶領藍軍創出唔少輝煌成就,而高華錫可以話成為左下一個十年既先行者,球員過去喺皇馬效力時期可以話獲奬無數,其中最為驚人就必定係連續三年三奪歐冠既偉大成就,當日選擇尋求挑戰離開班拿貝球場,以佢既條件其實係可以搵到一間比車路士更好既球會,不過最終藍軍亦幸運地得到佢既選擇先以借用身份先登陸史丹福橋一個賽季。
高華錫既加盟可以話為當時藍軍既中場線帶黎「質」既提升,以腳下功夫黎講可以話係陣中唯一一位能夠與夏薩特匹敵既球員,要成功喺佢身上搶到個波並非容易既事,加上同時具備速度以及推進能力,基本上高華錫可以一個人由中後場帶波直推到對面禁區都唔成問題,哩項特點亦省卻左唔少戰術當中既轉換細節,簡單直接長驅直進地將個波運上前場,而喺佐真奴同一時間加盟底下,與高華錫二人組成為中場傳控核心,令車路士喺控球上取到壓倒性優勢,喺戰術上嘗試為後場減壓。

而喺防守方面高華錫亦有一定輸出,喺中前場進行迫搶同時亦會睇準時機出腳作出攔截,加上覆蓋面積廣闊,基本上能夠同簡迪負責哂所有中場跑動及掃蕩工作,不過哩個三中場組合亦並非完美無缺點,其中最為致命既定必係進攻時前插入禁區哩一點,高華錫並不善於處理禁區頂去到龍門之間哩十幾廿碼既區域,喺前插助攻意識不足下令球隊尤其面對破密集時就更為顯得困難,再加上缺乏遠射能力,令到成條中場線都只能圍住對方禁區外圍猜,個個都「只推不射」。

而自林伯特上任後亦開始嘗試為中場線注入新元素,加入蒙特到中場當中希望提升活力之餘亦可以帶黎前插助攻等多元變化効果,而同時開發高華錫既射門意欲,鼓勵哩位克羅地亞中場多於喺近禁區頂位置起腳,最終亦成功喺剛剛哩個賽季取得兩個入球結束左佢喺近三個賽季既入球荒,鐵樹開花實在非常難得,如果繼續能以哩個方向同步伐進發的話,相信高華錫有條件成為一名更為完美既全能中場球員。

喺「青春風暴」底下亦有需要一班具備實力既球員帶領一眾小將進步,擁有高華錫於藍軍陣中實屬球會之福,而以佢岩岩哩個賽季既表現當選成為最佳球員可以話實至名歸,希望高華錫未來能夠帶領藍軍無論喺本地抑或是歐洲賽場上都可以走得更高更遠。


文章發表時間 : 06/09/2019 11:10
文章最後更新時間 : 06/09/2019 11:10

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  高華錫  林伯特  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→