《蹉跎歲月?劫後重生?真禾特來季應否佔一席位》

藍獅 於 16/07/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


近哩幾季好似每逢轉會窗都會打一篇關於「飲水哥」既文章,開始變成一個較為有規律既習慣,相信唔少車路士球迷對於上季真禾特被時任主帥沙利打入冷宮感到不公,意大利人係連一場本土盃賽既機會都唔比佢,而依加由名宿林伯特回巢執教,貴為同鄉既真禾特會有一絲機會得到重新嗎?

蹉跎歲月,哩四個字可以話足以形容球員自加盟車路士至今既處境,外界喺初期曾經一度傳出其實「飲水哥」並唔係前任主帥干地既收購目標,只係球會缺乏本土英人,所以至重金禮聘由李斯特城購入真禾特,並開出12萬鎊週薪,哩個數目對於一個核心球員黎講當然係物超所值,但如果對於一個連後備都無既球員黎講其實同倒錢落海無乜太大分別,而干地亦有盡自己身為球隊主帥既本份盡力用好真禾特。

干地希望哩位英格蘭中場能夠好似簡迪咁走上走落,多參與進攻推進之外同時亦要兼顧防務,較為靠近中場Box-to-box既角色,可惜既係「飲水哥」過往喺李城都唔係打開哩啲波,以往佢主要都係企喺防線前負責攔截同長傳分波,唔需要太多參與較為消耗體力既跑動工作,導致場上不乏真禾特走到「紅都面哂」既畫面,難以轉型之下顯得同干地既戰術格格不入,同時球員傷患亦都比較多,唔多唔少都有影響左佢既競技狀態。

而沙利上任後更將真禾特直接打入冷宮,就連佢想翻身既機會都無,完全被無視咁投閒置散,其實上季季初以至季中轉會窗都一度傳出有唔少英超中下游位置既球隊希望借用,但始終都因為球員週薪太高而無法達成轉會協議,而無可否認既係依加真禾特經已成為一件不折不扣既「水貨」 ,老實說係中場人手過多之下,真禾特實力上實在無法喺林伯特手中佔一正選席位,反而要睇既係能唔能夠喺後備之間穿梭,就個人而言佢同巴卡約高兩者之間就只能活其一,而喺前者擁有英人身份加上打法較為全面之下,相信留隊機會會比起法國人大。

不過始終都要取決於林伯特既戰術取向,同時球員亦要喺季前熱身賽表現出爭勝既決心,一切留待正式開季自有分曉。


文章發表時間 : 16/7/2019 14:45
文章最後更新時間 : 16/7/2019 14:45

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  真禾特  林伯特  飲水哥  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→