《始終難成大器的「波牛」 - 巴克利》

藍獅 於 12/07/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


巴克利,一個好早成名但一直上都唔到大枱既球員,由愛華頓轉投車路士初期被外界冠以「水貨」之名,到上任領隊沙利接掌後獲得一段3場3入球3助攻既記錄,曾經以為能夠為巴克利既職業生涯重新注入動力,可惜一切似乎都只係虛火,喺足球進程上停滯不前之下新任主帥林伯特能否打救哩位「8號」接班人呢?

巴克利自加盟藍軍後跟過干地同沙利兩位領隊,喺干地手中既英格蘭人其實得到非常之少機會,就算有得比佢落都唔係打比較擅長既攻中位置,職責上亦要參與防務工作,再加上斷斷續續嘅傷患都未能根治,令巴克利既狀態非常低迷;而喺沙利揮下所安排哩位「8號」喺場上既位置就較為適合佢去發揮,主要負責進攻端上既工作,加上算係係陣中少有遠射能力既中場球員,令巴克利喺過去哩個球季錄得5個入球6個助攻既數字。

不過哩位英格蘭中場既缺點其實都相當明顯,基本上每場波都見到佢會比人拍甩波既情境出現,係講緊無論係喺車路士定係英格蘭國家隊都有同樣畫面,仲要好多時係喺一啲相當危險既位置,同時佢個人較偏好上腳,好多時將個波推左去啲死位度,拖垮左球隊成個攻勢同節奏,因而被唔少球迷稱呼佢為「波牛」。

而身為佢既後輩,講緊既就係細兩年兼係同鄉既路夫斯捷克,由於兩者喺場上位置同球員特性方面都比較類近,難免令外界會將兩者直接互作比較,但無論喺持球推進上同技術層面方面「龍虎切」都比起巴克利踢得較為成熟,加上前者係藍軍自家本土青訓出品,路夫斯捷克有一種後來居上既感覺,如果唔係因為今季長期受背傷所困擾,理應佢會比巴克利得到更多既上陣機會。

本身車路士陣中既英格蘭人並唔多,喺上任隊長加利卡希爾離隊過後英人席位又少一人,同時受轉會禁令所影響,相信球隊都唔會選擇放走球員尤其係本土戶,而喺林伯特既戰術體系之下能否為巴克利重生?相信要先留待到熱身賽作觀察再落定論,不過可以肯定既係林伯特自己都唔希望見到哩位「8號」接班人繼續走下坡落去。

巴克利,相信今次會係你既最後機會黎喇...


文章發表時間 : 12/7/2019 11:15
文章最後更新時間 : 12/7/2019 11:15

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  巴克利  林伯特  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→