《跑得慢、唔夠快、無速度的上半場 成為車路士的失分關鍵》

藍獅 於 12/11/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : Evening Standard

不敗記錄未斷,更令沙利成為以新主帥嚟講最長不敗記錄的一人,可惜嘅係車路士喺今場波失分。遠征歐霸分組賽過後,藍軍回到史丹福橋迎戰另一支藍色球隊愛華頓,雖然車路士在主場優勢下一直襟住對方嚟踢,不過最終雙方都互無入球下各執一分,當中車路士攻力問題亦徹底浮現。

沙利今場源用番球隊聯賽陣容,只係由高華錫取代近期正選而要面對舊會嘅巴克利,攻擊線上嘅柏度亦先列後備,陣容上無乜太大變動。「跑得慢、唔夠快、無速度 」可以話完全係車路士上半場嘅寫照,開波初段受制於對手嚴密佈防之下,球隊只有零星攻勢,而傳波好多時都係交人而唔係交位,就算交位都係接唔到居多,球員與球員之間嘅互動配合非常之少,現位、走動亦都唔多,入局太慢可以話係車路士以往嘅老問題。

到下半場喺更衣室出返嚟,可能經沙利一番調整過後,球員們都開始積極主動推番快個比賽節奏,傳球速度亦都快咗,好自然可以牽引到對手騰出更多空位有利進攻,其實車路士喺下半場的確有幾下相當接近入球嘅機會,可惜一係中柱,一係就柱邊出界又或者比神勇嘅碧福特撲出,只能夠講實在欠運。雙方埋身接觸多,但球証喺一啲吹罰上似乎都有啲不公之嫌,主隊球員多番被侵犯下球証都視若無睹無比得益,令「 拖肥」嘅動作繼續變本加厲。

不過沙利喺一啲臨場調動下的確做得唔錯,曾經有球迷質疑佢話即使佐真奴無表現都唔會換走,今場正正用行動去話比大家聽事實並非如此,用法比加斯入替佐真奴,由於球隊下半場控制咗唔少攻勢,西班牙中場一落場可以話達到「 一針見血」嘅效果,同時亦都睇到佐真奴欠缺法比加斯傳球嘅「獨到性」。至於柏度換入韋利安,相信都唔需要多講,反而想講嘅係喺最後一個換人名額之下對沙利嘅解讀...

後備度上有巴克利同基奧特兩位攻擊手,後者能夠喺禁區拉散、牽制對手,傳中時亦能夠多個高點頂波攻門,而前者能夠後上前插,同時亦有禁區外遠射,最終沙利選擇換入巴克利喺前面增加一個攻擊點亦實在無可厚非,而喺法比加斯落場後似乎大大減少咗高華錫嘅拎波次數,只係做駁腳居多,巴克利雖然技術上未及得上佢咁好,不過喺向前跑動嘅攻擊意識好強,可以令球隊喺進攻上多一道板斧。

不過今場失分之下,沙利務必正視球隊入局太慢哩個問題,否則下次對住一啲更強主守嘅球隊就只會再次失分。

文章最後更新時間 : 12/11/2018 14:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  沙利  

留言

會員
我要評論
請按此登錄後留言。未成為會員? 立即註冊
  • Marjill
    Marjill 於 12/11/2018 評論 NO. 1

    其實主要係得一個進攻套路

快捷鍵:←
快捷鍵:→