《命運的愚弄 曾經的新星 - 蘇蘭基》

BluexLion車迷手記 於 09/11/2018 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : The Times

利物浦同車路士之間雖然都視對方為列強對手,不過其實兩間球會過往都有唔少球員轉會發生,較為遠有祖高爾,破哂當時轉會記錄既費蘭度托利斯,之後更加有班拿約、美利拉斯以及史度列治,而較為近期啲嘅,就有今集既主角,上季由藍轉紅既英格蘭新星蘇蘭基。

出身自車路士青訓體系,喺藍軍青年梯隊比賽中蘇蘭基都經已話獲獎無數,同一期嘅隊友有路夫斯捷克、艾巴咸、查路巴同艾基等人,可以話係近年嚟質素最高嘅一屆青訓,而蘇蘭基亦被認為係英格蘭前鋒線上嘅明日之星,具備優良嘅射門觸角,能夠自己持球推進一段距離再起腳。喺上年舉行嘅U20世界盃之中,英格蘭成功奪得冠軍嘅背後蘇蘭基可以話功不可沒,佢亦被評選為決賽賽事中嘅最佳球員。

可惜蘇蘭基同唔少年青球員一樣,最缺乏嘅就係耐性,喺前線同時坐擁迪亞高哥斯達以及巴舒亞伊兩為射手底下,蘇蘭基只能成為球隊中嘅第三選擇,未曾正式為一隊上陣,苦無機會嘅佢亦無心與車路士續約,選擇完約後離開史丹福橋。而當時有興趣以免簽形式簽下蘇蘭基嘅潛在球會其實都有唔少,除咗英超球隊之外遠至德甲RB萊比錫都想將佢收歸旗下,不過最於英格蘭人都選擇與另一支列強利物浦簽約。

上季加盟利物浦後,蘇蘭基的確得到唔少上陣機會,雖然好多時都係後備上陣,不過喺前線坐擁費明奴底下,有得出場總好過無得出,全季一共為紅軍喺各項賽事上陣三十場,交出兩入球一助攻,表現唔算突別搶鏡,不過年輕球員總係要比時間琢磨先會進步。不過到咗今季情況就有一百八十度改變,兩位上季外到西布朗同禾夫斯堡嘅隊友回歸,而史度列治更完美地搶去蘇蘭基嘅後備位置,與奧歷治雙雙被高普打入「冷宮」,由當日嘅第二選擇,今季變成第三或第四嘅選擇,情況可能仲比起當日喺車路士更為惡劣。

或者,一切都係命運的安排,命運的愚弄。

文章最後更新時間 : 09/11/2018 10:00


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 利物浦  車路士  蘇蘭基  高普  

留言


請按此登錄後留言。未成為會員? 立即註冊
  • 徐定富等你 於 09/11/2018 評論 NO. 1

    成篇文講既就係山係石頭海係水 真係好撚悶

  • ShunFei 於 10/11/2018 評論 NO. 2

    車迷咁樣講法 係有啲酸人嘅感覺

  • snakeyim 於 12/11/2018 評論 NO. 3

    去德甲

快捷鍵:←
快捷鍵:→