《藍軍化身英超「羅賓漢」作客拎分主場送分 車路士對修咸頓賽後分析》

藍獅 於 27/12/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


老實講都真係好難解釋點解車路士近期喺主場可以失咁多分得黎,而作客既賽事反而仲比主場攞得多分,如果真係要原因,只可以解釋為種種問題既不穩定因素所引致,再加上快車期以及輪換,喺未改得切調整之前經已要準備下一場比賽。

今場波林伯特繼續以三後衛陣式應戰,希望延續上場對熱刺全取三分既氣勢,不過喺幾個位置上都作出左輪換,三名中堅左中右繼續係以湯姆利、蘇馬以及魯迪加搭檔,左翼衛方面由艾馬臣接替馬高斯阿朗素,而右翼衛就都係艾斯派古達,至於中場方面有換上佐真奴拍簡迪,而前場就由艾巴咸伙拍韋利安同奧岱作攻堅,以哩個賽前陣容黎講,明白有輪換需要,不過個人喺賽前睇到哩個正選名單既時候最為斟酌於奧岱既位置,認為理應係佩利錫作正選較為合適。

主要原因係蒙特不在正選之中,其實之前都有講過林伯特既戰術體系入面係非常之依賴蒙特哩位年輕球員,佢除左為艾巴咸提供身後支援外,亦會經常到邊線協助兩位翼鋒,配合佢地進行小組式推進,同時亦需要連接中後場串聯,但奈何車路士依加只有蒙特一位能勝任其職,但球員體能上亦不能負荷日接日既賽事,始終都需要輪換休息。而當佢不在場之中,如果單以奧岱同佩利錫兩者黎計,就理應以後者作優先,兩者雖然都較著重於個人技術,但佩利錫經過一輪調教後無論係回後拎波時機以及配合隊友走位方面都比起奧岱優勝,相反後者長時間要波在腳,當無球時就企埋去中場位置等波,疊左隊友位,令本身翼鋒位空左出黎,無疑令對手只要利用人數就更容易作出防守部署,而哩場波正正就顯示得到奧岱既個人問題。

正式講番場波,其實兩隊成個上半場都處於一個相當膠著既狀態,即使車路士係取得唔少控球權,但對住修咸頓既4222或者叫442陣式時其實無乜太多甜頭,形勢上甚至稱得為「五五波」,而喺簡迪搭佐真奴哩對中場下,前者會改為負責參與進攻工作較多,而佐真奴會繼續墜後校炮角色,同高華錫拍簡迪時後者既職務有啲唔同,今場波主要有幾個問題導致到球隊全失三分。

首先,喺前場蒙特不在場之下,變相球隊組織進攻果下就只能依靠佐真奴,但意大利人位置上係墜後中場,唔可能長時間喺前場位置幫手組織攻勢,引致藍軍前線基本上無乜組織可言,主要係靠球員個人能力同速度撞入禁區,或者無目標下單調地挖個波入禁區。其次,邊路球員極少成功順勢猜傳互動再加走位配合,今場波左右兩條邊既球員都好少做到太多小組配合,即使翼衛或者中場壓上黎幫手,對手都唔會比你做到太多人數上既優勢,再加上據報艾斯派古達有輕傷在身,今場波明顯不在狀態,而可以勝任右翼衛既小將尼爾斯占士亦不在席上(未知原因 網友可補充),左右二路都唔能夠作出太多攻勢。繼而後防線亦有唔少個人失誤,湯姆利掂唔到個波被對手打穿,魯迪加好幾次被對手假動作推左走右擺脫,而蘇馬亦難以喺龍門作最後防線阻撓對手攻門。

不過近哩兩韋利安狀態的確火熱,今場波好幾下盤扭動作同接應都見得到球員既狀態真係好好,黎緊週末車路士就要作客阿仙奴,喺轉會窗未開之前就要睇下林伯特仲有冇咩方法令球隊增加攻擊板斧以及提高整體穩定性,如果唔係就真係正式冠名成為英超新「羅賓漢」架喇。


文章發表時間 : 27/11/2019 11:15
文章最後更新時間 : 27/11/2019 11:15

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  林伯特  修咸頓  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→