《玉可琢也難以成大器 更何況只是一塊「爛」玉 - 巴克利》

藍獅 於 26/12/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


巴克利曾經係一個被寄予厚望既名字,但經過時間既洗禮後經已變得雷聲大雨點小,後浪推前浪下更被唔少英格蘭後輩蓋過峰頭,當日於愛華頓轉會到車路士以為會喺職業生涯上更上一層樓,誰不知反而依加變成隊中可有可無的一人,巴克利似乎亦要開始為自己既前途作下一步打算。

哩位「曾經」新星過既英格蘭人自登陸史丹福橋後,前前後後跟過三任主帥,干地、沙利以及依加既林伯特,先講干地,巴克利喺意大利人既戰術體系之中並無一個妥善既發揮,對於哩名善於打攻擊中場既球員黎講難以容立於干地既三中堅陣容內,加上球員當季加盟後季初一直處於養傷階段,錯過左當季賽前熱身賽等對戰術內容既了解,所以被外界認為車路士即使以一個平價收購左巴克利,但以表現黎講亦只能稱得上為「水貨」。

而轉任到沙利過後,一度為英格蘭人帶黎少量既「重生」光芒,唔單止季前熱身賽有亮眼表現,更喺季初既賽事錄得一段連續3場3入球3助攻既紀錄,而沙利既副手藍軍名宿蘇拿亦對於巴克利非常器重,認為佢係隊中碩果僅存擁有同林伯特相同特質既中場球員黎,的確以當時既陣容黎講,巴克利係各個中場之中較敢於喺禁區頂位置施射既球員黎,而自奧斯卡、美利拉斯等遠射能手相繼離隊後藍軍一直都缺少哩類型球員,導致中場缺少左一度能夠破網既進攻板斧。

但巴克利一直難以維持長時間既穩定表現,狀態亦非常飄忽不定,可以維持連續幾場唔錯既表現同時,亦可以一百八十度大轉變之下打番好多場「西波」你嘆,球員自己本身都係「要波」類型既中場,但波底其實唔算得上話特別好,加上判斷力慢,好多時都淨係識拎住個波向前衝而缺乏大局觀,引致好多時都會拖慢左球隊既進攻節奏,又或者喺危險區域比對手搶番個波繼而被打快速反擊,被球迷稱呼為「波牛」。

而自林伯特執掌帥印過後,季初其實都有比巴克利唔少上陣機會,表現亦未見有好轉跡象,再加上球員喺場外唔潔身自愛,分別醉酒搭的士無錢找數以及養傷期間比人見到赤裸上身去酒吧跳舞,無疑絕對令球員生涯過往非常檢點既林伯特帶領唔少壞印象,當然,喺路夫斯捷克仲未完全復出底下,相信林伯特都仲會有對於巴克利既需要,始終隊中缺少蒙特哩個攻擊型中場既輪換,巴克利雖然能勝任其位,但執行職責上能唔能夠做到,仍然係未知之數。

巴克利講下講下依加都二十有六,唔算老但都唔係後生,論機會唔係無比過佢,但球員一直交唔出說服人既質素,而蒙特、路夫斯捷克等新晉球員至少交到貨出黎比大家睇,既然係咁的話巴克利其實都係時候為自己既前途作出打算。


文章發表時間 : 26/11/2019 12:30
文章最後更新時間 : 26/11/2019 12:30

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  巴克利  林伯特  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→