《職業生涯的黃昏 回到最初的起點 - 加利卡希爾》

藍獅 於 07/08/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


加利卡希爾自六月尾與車路士完成合約後一直都未有落班消息,雖然哩位前藍軍隊長未必有魄力再喺列強競爭,不過對於一啲英超下游什至中游既球會黎講其實都相當「夠殺」,初時一度傳出有泰利做助教既維拉什至曾經效力過既般尼都有意將卡希爾收歸旗下,無諗過最終竟然比水晶宮能夠捷足先登,哩次轉會對於卡希爾既職業生涯黎講你可以話係一種倒退,不過英格蘭人其實都經已三十有三,用另一角度睇可能一切都只係回到最初的起點。

可能連球員本人都估唔到,當日出道於維拉既自己能夠有機會一嘗加盟豪門滋味,什至榮登接任隊長一職。出道於維拉青年軍,卡希爾先後以外借身份加盟過錫菲聯同般尼,直到轉會至保頓後開始確立左自己既後防正選地位,球員屬於典型英式中堅一貫硬朗作風,善於制空以及身體對抗方面,但同樣地亦擁有速度同轉身偏慢等弊病,而車路士喺當年坐擁「傳奇隊長」泰利、伊雲奴域以及早一季加盟既大衛雷斯之後亦願意花資金收購卡希爾,可以話對哩位英籍球員既未來存在一份重視。

加盟後其實球員主要都係被定位為第四中堅,無諗過機會亦好快黎臨,受惠於泰利受傷令卡希爾好快得到上陣機會,亦令佢需要伙拍大衛雷斯喺當屆歐聯決賽把守後防線,臨危受命下最終亦能為球會贏得第一個「大耳朵盃」。隨後無論喺摩連奴二次回歸定係干地既三後衛陣式當中,英格蘭人依然佔一核心地位,加上泰利從旁提點,令卡希爾既發揮更加穩定,繼後為球隊奪得英超、聯賽盃及足總盃等一個個奬項,亦隨住泰利離隊接捧成為車路士隊長。

但隨住年紀一路大而自己本身既強項一路減弱之下,戰術效益自然會逐漸下降,再加上腳下功夫差難以適應現代式足球體系,亦係到依加大衛雷斯仍然能夠留隊而哩位英格蘭中堅需要離隊既主要原因之一,不過對於英超本土聯賽黎講,以卡希爾本身既能力其實都依然能夠搵到食,再加上佢以往無論喺球會定係晉升為大國腳既豐富經驗,相信都絕對能夠將水晶宮既防線提升一個檔次。

由英超中下游晉升到列強效力,贏盡所有奬項更接過隊長臂章,絕對可以話此生無憾,踏入職業生涯的黃昏,再一次返回中下游球隊效力,一切猶如都回到最初的起點...


文章發表時間 : 07/08/2019 12:00
文章最後更新時間 : 07/08/2019 12:00

報導來源 :
Crystal Palace(已官宣)


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→