《從當日被寄予厚望 到今日愈走愈遠 - 舒賀爾尼》

藍獅 於 01/08/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


舒賀爾尼,一個耳熟能詳嘅名字,如果你有留意開德國國家隊,又或者德甲聯賽,相信對哩個名絕對唔會感到陌生。來來回回,由德甲到英超,再由英超回流至德甲,到上季又再一次黎到英超,沒想到經過一季後依加再一次離開英格蘭,但今次唔係返去德國,而係遠赴俄羅斯以借用身份加盟莫斯科斯巴達,由當日被寄予厚望到今日愈走愈遠,舒賀爾尼既足球生涯可以話係高山低谷。

德國人自出道以黎大大話話都經已效力過六間球會,睇得出佢嘅職業生涯自第一次離開英超之後一直都走緊下坡。當年效力緊利華古遜嘅佢可以話光芒四射,吸引到果時仲係車路士領隊既摩連奴目光,將佢由德國帶到黎英格蘭,而果時唔少車路士球迷都對舒爾尼抱著一定期望,畢竟德國人總係以有紀律、效率以及機動性見稱。果然,舒賀爾尼亦的確不負眾望,好快帶到眼前一亮嘅表現比到車迷睇。

每當球隊面對落後、失分時刻,摩連奴都會委派舒賀爾尼以後備奇兵嘅身份登場,初黎報到經已為藍軍搶番唔少分數。即使無球在腳既時候,舒賀爾尼亦會配合隊友進攻走位,製造埋門機會,而且佢走啲位亦都非常「食腦」,好似永遠都走到啲空位咁,令到當時既「派牌王」法比加斯經常都提供到助攻比佢,球隊嘅進攻模式更加立體;但舒賀爾尼並非一名攻守兼備嘅球員,而摩連奴過往都好注重防守迫搶,即使係攻擊球員亦需要分擔球隊防務工作,就因為咁,舒賀爾尼嘅「熱戀期」亦都好快因為狀態低迷而消失。

仲記唔記得14年世界盃決賽,唯一入球嘅助攻係邊個?正正係由舒賀爾尼所交出,當時戴著世界盃冠軍光環以及關鍵助攻嘅佢返到黎車路士,表現不但未及上季搶眼,更往往喺關鍵時候令到球隊失波,之後更加因為急於表現自己,浪費左球隊唔少入波機會,而防守表現亦未合乎摩連奴嘅標準,可以話攻不銳守不穩,進退失據嘅佢最後好似跌入左一個迷失旋渦咁,最終變成球隊收購古亞達度嘅籌碼。之後先後效力禾夫斯堡、多蒙特,上季被外借到同為倫敦球會既富咸為期兩季,但後者降班後舒賀爾尼選擇離開,直到日前公佈加盟莫斯科斯巴達。

傷患同狀態起伏不定可以話係舒賀爾尼既足球生涯頭號敵人,選擇離開主流球壇遠赴俄羅斯相信都係迫不得已,二十有八既佢亦未到黃昏之年,仲有時間比佢重拾狀態,希望舒賀爾尼能夠真正擺脫傷患,再回到熟悉既球迷目光之中。


文章發表時間 : 1/8/2019 14:55
文章最後更新時間 : 1/8/2019 14:55

報導來源 :
AS(已官宣)

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→