《缺乏一劍封喉的技倆 現在的車路士正正欠缺一個拉美利斯》

藍獅 於 28/03/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


沒有一貫巴西人細膩既腳法以及出眾既球技,亦沒有身高或體型上既優勢,更沒有星味既人氣,不過佢擁有既技能係現今球壇都非常吃香既野,亦係佢喺足球生涯中效力過最耐既球會車路士依加所缺乏既野,今集想講既主角,喺史丹福橋經歷過接近六個球季,為藍軍衝擊一個又一個奬項既冠軍級球員,佢叫拉美利斯。

巴西人於10年由葡超賓菲加轉投車路士,當時唔少藍軍球迷對於哩位身型單薄而司職中場既球員都相當陌生,不過拉美利斯好快為大家解開所有謎團,利用自己跑不完既氣力,就好似上左一粒用唔完既電芯一樣,全場九十分鐘不斷奔跑,無論喺前場以至後場都可以見到佢既身影,毫無力竭既跡象,再加上身形細小以及爛打既球風,為當時作風偏向硬朗既車路士中場增添一份靈活而更糾纏既味道。

拉美利斯既理想位置係中場中,透過佢跑動既覆蓋面積同時助攻助守,亦姐係依加簡迪所做緊既野,而較多變既係佢亦可以擔任防中、攻中以及右中場哩三個位置,除此之外,反擊哩項技能亦係哩位巴西中場最為殺食既地方,反擊時佢向前全速推進既速率同步伐基本上係無人能擋,再加上純熟既埋門技巧,腳面一tick個波就以拋物線既角度笠死龍門,成為佢獨當一面既技倆。

當中最為深刻既定必係於12年作客魯營球場與巴塞隆拿決一死戰所入既果一球,如果無佢,果屆既「大耳朵盃」得主亦未必係車路士,單單為車路士效力既五年半時間,都經已為球隊贏盡歐聯、歐霸盃、英超冠軍、聯賽盃同足總盃,為藍軍立下唔少汗馬功勞,大滿貫功臣無容置疑。不過令人意外既係,本以為拉美利斯至少會伴車路士效力到三十出頭,但就以廿八歲既黃金之年就選擇離開轉投中超,毅然告別歐洲球壇,不禁令一眾球迷認為巴西人單純「向錢看」,拉美利斯事後指出主要原因,係被當時既看守領隊希丁克所摒棄,引致有離隊他投既想法。

現年三十有三拉美利斯經已告老還鄉重返老家巴西效力彭美拉斯,繼續享受餘下足球生涯尾期的歲月時光,要喺現今球壇再搵番一個同巴西人相近特質既球員並非一件容易既事,一個職業球壇,就只有一個拉美利斯...


文章發表時間 : 28/03/2019 11:00
文章最後更新時間 : 28/03/2019 11:00

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  拉美利斯  

留言


請按此登錄後留言。未成為會員? 立即註冊
    快捷鍵:←
    快捷鍵:→