《車路士中場人才濟濟 為何林伯特還要響起歸家的訊號召喚迪格蘭賴斯?》

藍獅 於 26/03/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


迪格蘭賴斯(Declan Rice),一名於車路士青訓出道既中場球員,不過真正成名之地反而喺同為倫敦球會既韋斯咸,近日傳出藍軍有意將哩名自家青訓球員再次帶到史丹福橋既消息,能夠喺青春風暴之中再增添一名本土戶貌似係好事,但賴斯係咪適合喺依加車路士既戰術體系又會係另一回事,可以一齊分析一下....

賴斯早於七歲時就已經已入車路士青年梯隊,同期隊友之中更有依加於林伯特手中佔一席位既「老死」蒙特,但兩者於藍軍生涯可以話有天淵之別,蒙治於梯隊中一直扶搖直上,相反賴斯早喺十四歲果年就被車路士放棄,選擇轉投到同巿另一支球會韋斯咸,繼續發展自己成為職業足球員既理想,亦一步步於「槌仔幫」由青年軍晉升到一隊之中,更成為依加韋斯咸既常任正選之一。

球員能夠勝任防守中場以及中堅兩個位置,一貫英格蘭傳統防守中場作風,以攔截及跑動見稱,而同時賴斯擁有高達6尺1吋既身高以及唔錯既身體質素,可以話係一名相當「爛打」既防守中場球員;不過哩位韋斯咸中場亦同以往英人防中一樣,波底唔係話特別好,亦主要依靠較粗野既方式去破壞對手攻勢,而取得控球權後大多時亦要交由其他中場球員發板,功能較為單一。

而喺車路士現有既中場之中,先行排除真禾特以及養傷已久既雲堅基爾兩位早以被放棄既球員,論防守能力,簡迪定必係咁多位中場當中最強既一個,但睇番林伯特今季所打戰術,安排比簡迪既職務依然貫徹上任主帥沙利既作風以前場覆蓋面積為主,而墜後位置既角色依然係交比善於梳理中場既佐真奴,林伯特所搭建既戰術當中根本唔需要一名單純處理防守職務既中場球員。

既然連簡迪都要改造而唔可以打番自己既老本行,更何況講緊賴斯哩名剛二十出頭既後生仔?再加上早前另一青訓球員基爾摩亞(Billy Gilmour)又喺一隊打起左,位置同打法上佢都較接近係佐真奴果類型中場球員,同時唔好忘記車路士喺同樣位置仲有今季外借左去德甲RB萊比錫既岩柏度(Ethan Ampadu)下季會回歸,喺黎緊人才濟濟既中場人腳之中實在見唔到有迪格蘭賴斯既需要。


文章發表時間 : 26/03/2019 12:45
文章最後更新時間 : 6/03/2019 12:45

報道來源 : Skysports

相關文章 : 《首次大戰正選就榮獲最佳球員奬項 此小子屬何方神聖? - 基爾摩亞》

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→