《章法無變問題依舊 運氣眷顧下的三分︱愛華頓對車路士英超賽後感》

BluexLion車迷手記 於 09/08/2022 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


章法無乜大改變,但問題依舊,前面唔夠創造力,後面守得唔夠穩;先講攻,提速唔夠,啲傳送節奏好慢,對手只需要囤積人數就可以令你難以突破,同時兩邊翼衛好少快速大方向轉變,好多時都只係不段左右橫移短傳,傳送完全唔夠威脅;再講互動性,無球在腳下既走動太少,絕大部份球員都係等波到,好少話會將個波放落個位度比隊友去追。

史達寧的確激活左前線,盤扭、過人、傳送,一個人做晒,走位意識上即使係曼城棄將都好明顯高過我地一班,不過幾次舉手向前插都無人交到through ball比佢,哩個係上季盧卡古在陣都面對既問題,中場得佐真奴同高華錫有哩方面既能力(仲要唔算精於哩範),中前場至少要入多個創造型既,哩點都講左好耐;再者夏維斯、蒙特兩個喺場波既表現完全唔得,杜曹係想佢地同史達寧多啲靈活換位係好事,但啲迫搶完全無系統,兩個喺前面迫後面無人做follow up,尤其係下半場體力開始消耗得咁上下,愛華頓後場兩三下短傳已經去到你既心臟地帶面對三中堅,前線唔給力就會比到後場好大壓力,已經好幾次提到夏維斯唔適合打邊,放番佢喺中間反而仲做到多啲支點接應、set波同入攝,走下中堅啲身後位仲剎食,要佢打邊比對面雙閘mark死真係隱晒形。
.

再講守,真係難以想像如果隊長真係去左巴塞的話點算,佢個位如果係查路巴打的話應該撳爆平安鐘,但哩條年過三十既後防線真係唔頂得幾耐,施華同高列巴尼都踢到老抽,要前者以三十七歲之齡打足九十分鐘同虐老無分別,依加先講緊賽季第一場開咧,後者就落腳都幾準,不過啲判斷要再快啲,慢一秒對手就會到拍甩你個波出面危險場面,個人認為後防就點都要補多個;場波仲睇到多樣野,球隊三線距離過寛,尤其係前面三個一壓左上去中場無人跟,好多時見到簡迪上埋去後面就無人,佐真奴覆蓋面就向來都唔高,但一去到下半場隊波好似斷開兩節咁,人地兩下就黎到我地度對中堅,唔係防線三大老將各自老有好表現的話,愛華頓應該至少都拎到一分走。

捷維爾個態未得,啲過人動作都未係好流暢,而古古尼亞既加盟應該會為左路由守轉攻帶黎變化,今場波臨危受命後備落場,表現都幾活躍,啲地面傳送到位又夠力,仲有幾下帶番生個波都令人感覺幾亮眼,佢都幾偏好打翼衛時走入中路做波,上季杜曹其實都試過用占士同捷維爾適時收中路當半個中場咁打,如果繼續沿用三中堅哩套陣式的話都幾期望見到有哩個變化,值得留意。

總結哩場波見到球隊未上力,大部份球員個態係未完全好fit,而戰術套路既問題亦依舊,面對密集唔夠爆點應付,入完第一球就無以為繼咁,無乜動力去爭取多一個入球保住勝局,以哩個態黎緊去對熱刺真係未必夠砌;不過幾位新球員表現都唔錯各有亮點,希望融合得快啲幫到球隊,至於餘下既轉會窗,期望中前場同後場都各入到一個,事關重要。


文章發表時間 : 9/8/2022 12:15
文章最後更新時間 : 9/8/2022 12:15

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  愛華頓  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→