《穩步上揚的無名英雄 - 魯迪加》

藍獅 於 04/02/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

.圖片來源 : Daily Express

魯迪加,今季初沙利委以重任成為防線上的核心成員,伙拍大衛雷斯一同陣守中路,兩者於上季干地執教時期都只獲得少量機會,反而依加哩個組合喺沙利既戰術體系下既發揮不俗,英超失球數字暫時僅次於利物浦及曼城之後,相信哩項數據亦令唔少球迷感到意外。

魯迪加成名於德甲老牌球隊史特加,之後隻身走到意大利加盟「首都狼」羅馬,其實車路士一直都有留意德國人嘅動向,直到17年先正式將佢收歸旗下,當時球會頭號目標邦路斯拒絕出國效力,而雲迪克喺價錢上亦唔合乎藍軍嘅預算,喺文路拉斯等煙幕下突然爆出收購嘅係其隊友魯迪加,成單交易由傳出到官宣其實都真係唔夠一日,如果唔係留意開德甲或者意甲的話,對佢嘅認知應該係少之又少。

魯迪加其實可以算話係一名後防嘅通天老倌,除左中堅之外亦可以擔任閘位球員,喺效力羅馬嘅時間亦時常喺三中堅與四後防之間轉換,相比於平時其他後防球員,魯迪加擁有較強嘅爆發力,跑起上嚟嘅段速什至拍得住啲翼鋒,同時亦有良好嘅傳球視野,可以將皮球精準地透過長傳運送到前場,而且位置感同單防能力都唔差,所以好多時見到一啲進攻球員單對單對佢都無乜甜頭可言,就好似魯迪加嘅前羅馬隊友沙拿咁。

上季加盟後喺時任干地手下得到嘅正選機會並唔多,好多時都係以左後衛身份上場,而去到今季喺沙利旗下成為鐵膽正選,伙拍大衛雷斯陣守中路,巴西人同馬高斯阿朗素一樣前插意識強,但回防速度慢,所以好多時見到對手打反擊時,都要魯迪加幫佢地補位執漏,雖然偶有犯錯未算太過穩定,亦相比於傳奇隊長泰利嘅水平仍有一段距離,不過相信只要德國人繼續得到出場機會吸收經驗,自身進步下未來必定成為球壇其中一位高水平嘅後防球員。

魯迪加,藍軍後防既未來就要靠你喇。


文章最後更新時間 : 04/02/2019 16:30


《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  魯迪加  沙利  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→