《盧卡古與夏維斯不能同場? 探討車路士的進攻隱憂與問題所在》

藍獅 於 15/10/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


經歷強強大戰對曼城同祖雲達斯兩連敗之後,車路士最終都喺國際賽週前最後一場對修咸頓既賽事取下勝仗,總算係暫且避免左小低潮繼續延續下去,而國際賽期間亦正好比到杜曹去整合及處理一下戰術思路,其中盧卡古與夏維斯的同場位置亦係近期球迷們較為熱哄既話題,今集將會同大家探討一下兩者既特質同合作可能性,同時延伸出車路士喺進攻方面隱憂。

杜曹由開季至今有6場波都嘗試盧卡古與夏維斯正選同場,安排前者擔任正中鋒而後者為右翼鋒為主,不過有留意開車路士近兩年點踢既球迷都知道,夏維斯從來都唔係一個偏好拉邊既球員黎,即使擔任翼鋒角色無論有球還是無球在腳亦會較常走到中路發展,喺戰術層面黎講當然有利於進攻,翼鋒球員扣入大位變相讓出邊線待閘位或翼衛球員插上變相增加多一個進攻點,但現實係咪真係發揮到出黎就好睇後上球員既個人能力。
域斯占士既前插突擊力當然無容置疑,哩位英格蘭右閘球員除左擅於傳中之外亦具備獨力殺入禁區射門既技能,但自從佢喺對陣曼城既陣事受傷之後,佢既右翼衛位置就交由艾斯派古達接任,後者雖然喺傳中準繩度方面依然維持高水準,但面對住頻繁既上落次數始終都喺速度同體力方面較為遜色,變相會令夏維斯走入中路後減弱左右邊區域既進攻輸出,即使德國人嘗試走到左邊發展,而擔任左翼衛主力既馬高斯阿朗素同樣較為偏向自己走入禁區亦變相令中路更為擠塞。

而同時盧卡古同夏維斯喺場上重疊位置既畫面亦出現過不少次,正當大眾都以為前線較大機會需要犠牲添姆雲拿之下,如果依舊維持盧卡古有不可動遙既正選地位作大前題底下其實夏維斯既處境會比起雲拿更加唔樂觀,主要由於後者喺擔任翼鋒時並無偏好於拉邊或入攝其中一種,只要佢認為邊度有空位有機會就會走去果度,令球隊既進攻範圍更為廣闊,而杜曹近期亦明顯開始投入更多上陣時間比添姆雲拿,雖然未知究竟係咪同球員近日傳出離隊傳聞有關,不過的確係減少左中路塞車既情況出現。

延伸文章 : 《攻擊線上人滿之患 添姆雲拿或成為杜曹手上首位犠牲品?》

自夏維斯加盟藍軍以黎其實都嘗試過出任好幾個位置,於初期林伯特曾經嘗試安排佢擔任三中場其中之一,但效果完全唔得,而其後喺杜曹上任後交替出任中鋒以及右翼位置,明顯喺主打中鋒時候既表現最好,始終哩位德國人既個人特質只要愈貼近禁區就能發揮得出愈大既效果,雖然身體條件未必及得上盧卡古既身型,不過夏維斯既爭頂數據其實一直都唔差,作為支持控個波落黎做二傳還是自己包辦晒推進同射門都一樣可以,而同時盧卡古亦曾經嘗試過喺比利時國家隊擔任過右翼位置,由迪布尼或夏薩特出任正中鋒,將佢同夏維斯交換位置其實係值得同可以一試。

以往盧卡古都有間唔中走到右邊路位置幫波,騰出空間比到夏維斯或者其他隊友插上,再加上喺國家隊擔任過既經驗,如果真係希望安排佢與夏維斯同場的話,將兩者互換位置會係解決方法之一,當然兩者既技術特質其實都相當類近,只係風格上存在差異,不過既然杜曹選擇得喺夏維斯在陣之下都收購盧卡古,就必然有佢既構思同想法,留待國際賽後睇下會唔會有一啲新既變化比大家睇到。


文章發表時間 : 15/10/2021 11:40
文章最後更新時間 : 01/10/2021 11:40

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  夏維斯  盧卡古  添姆雲拿  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→