《當年林伯特的接班人 今日再度回歸荷甲 被傷患摧毀的豪門夢 - 雲真高》

藍獅 於 12/10/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


雲真高,又名雲堅基爾,當年於荷甲獨當一面,被譽為荷蘭中場的未來,更以林伯特接班人之名降臨史丹福橋,可惜天意弄人,傷患不斷於球員生涯中穿梭,唔單止令佢無法再喺生涯上再進一步,係就連健健康康可以落場既機會都屈指可數,今日再一次被外借到成名之地荷甲,亦係時候為豪門之旅畫上一個句號。

計埋今次,雲真高已經係第五次以車路士球員既身份被外借出去,當日摩連奴將佢由荷甲帶到史丹福橋,主要因為荷蘭人同時具備傳球視野、控制節奏以及覆蓋面等可待發展既潛力,特質上亦相當與林伯特相似,但相比於後者既鐵人元素,雲真高就真係點真拉唔上哩兩隻字,甚至可以話係一個不拆不扣既「玻璃人」,即使經歷好短期既傷癒後亦影響到落場狀態,跟住踢無幾場又會再傷過。

雲真高不斷於病床與冷板凳上輪流穿梭,轉換環境似乎係當時比較上可行既唯一方法,荷蘭人先後外借去到意甲既AC米蘭以及當時仲喺英超既史篤城,但交出既表現都相當一般,亦因為兩支球隊都無意買斷甚至續租,而喺哩個時候家鄉球會PSV燕豪芬伸出引援之手,給予雲真高一個重回熟悉成長地既機會,經歷短短半季哩位荷蘭中場就交出7個入球以及4個助攻,無論表現同狀態都明顯有顯注提升。

當時球員取向始終都係希望能夠回歸史丹福橋搶佔一席位,但奈何交出亮眼既數據後亦被時任主帥干地投下不信任一票,而同時間PSV燕豪芬又再次向雲真高抛出橄欖枝,希望佢能夠再次回國協助,而喺別無其他選擇下球員亦願意再一次加盟,PSV燕豪芬更同時送上十號球衣及隊長臂章,對於球員給予一份肯定,但不合時宜既係正當雲真高再一次交出一份高質量既成績表後,傷患又再一次出現,而養傷期更長達一個賽季有多。

經歷接近兩個球季都未有上陣,但車路士反而喺早前同荷蘭人簽下一份為期一年既短期合約,將球員既合約完結期推到下個賽季,當然,當中並不意味住佢擁有留隊機會,而只係管理層並不希望人財兩失,仍然希望能夠將佢賣到個好價錢,奈何雲真高既潛在買家實在唔多,即使PSV對佢幾有興趣都好都無法負擔得起轉會費都週薪,既然係咁的話其實藍軍理應一早將佢完約放走,總好過仲過住依加既人球生涯。

希望雲真高今季喺PSV能夠遠離傷患,始終對於依加既佢黎講,最重要既並非名成利就,而係可以享受上陣踢波既時光。


文章發表時間 : 12/10/2019 11:20
文章最後更新時間 : 12/10/2019 11:20

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  雲真高  雲堅基爾  PSV  林伯特  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→