《「無鋒陣」正式解鎖 魯迪加梅開二度救駕 李斯特城對車路士賽後分析》

BluexLion車迷手記 於 02/02/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


黎到轉會窗關閉後既第一場賽事,車路士作客李斯特城,兩隊其實近既狀況都唔算穩定,尤其係林伯特所帶領既藍軍經已連續兩場失分,喺無任何補強之下車路士最終拎住一分離開王權球場,可算是不幸中之大幸,繼續以第四名保持住喺英超排名榜,但隊中有太多問題有待林伯特逐一拆解。

今場波林伯特其實有幾個相當突破性既舉動,先係安排卡巴尼路頂替基柏作正選,再喺下半場尾段以無鋒陣作賽,而換走艾巴咸時並沒有安排後備席中唯一前鋒巴舒亞伊上陣,哩三個舉動都相當令人意外,林伯特今場波明顯向基柏同巴舒亞伊投下不信任票,外界近日一直傳出車路士有意於門將位置上作出收購,主要原因係今季基柏出現太多個人失誤,令林伯特感到不滿。

喺正選陣容上,除左卡巴尼路之外,柏度喺今場波亦以正選十一人上陣,伙拍艾巴咸以及奧岱作攻堅,而身後攻中位置就繼續由蒙特負責,至於雙中場就安排左佐真奴配搭簡迪,高華錫繼續未能晉身於正選之中,至於後場方面亦繼續以魯迪加加上基斯甸臣哩個中堅組合,而左右二閘亦源用艾斯派古達及尼爾斯占士作正選,以哩個正選陣容黎講,主要挑剔於高華錫繼續要擔任後備哩個位,哩位克羅地亞中場經已多場英超未有躋身正選名單內。

今場波主要分三個階段黎睇,上半場分為前後兩部份,各自由車路士以及李斯特城兩隊各帶一段形勢,藍軍一貫劇本以開賽先搶方式帶動比賽節奏,搶佔大部份控球權,但亦同以往一樣只要不幸走甩幾個「叉燒」機會,就會比對手lead番住個形勢,今場波其實雙方球員喺王權球場球場都仆左唔少次,兩隊球員夾夾埋埋分分鐘都仆左有廿次以上,唔知亦係咪因為咁車路士有好幾腳黃金機會都係走甩左半個身位,交到位但唔到腳,負責最後一射既球員一個就差半步,一係就人前波後咁,除左話把握得唔好之外,亦的確係欠運。

而今場波負責右邊側擊既奧岱表現亦都相當唔理想,經常性回後拎波時比對手「打荷包」輸反擊,而喺前線進攻上亦經常斷纜,如果唔係柏度體能下降不足以維持全場有效輸出的話,下半場被換走既理應係奧岱先啱,柏度今場波係踢得幾好,喺前場都製造到好幾下黃金機會,而佢喺被聯防之下亦能以個人能力攻門,波底好亦令球隊喺側擊上能夠搶佔優勢。

至於第三階段就係林伯特喺換入巴克利時以一個「無鋒陣」作賽,當時鏡頭一影英格蘭人於場邊等待入替時以為係會換走蒙特,誰不知鏡頭一影跑緊去場邊既竟然係艾巴咸,而哩個沒有正箭頭既442陣式亦唔算得上好有敵,韋利安以中心第一人時的確喺對手身後搶到好幾腳波,但喺缺失對抗性下令車路士前場缺少硬度,面對住蘇恩古以及伊雲斯下喺搶佔第一點並未有太多優勢,再加上哩個組合以及戰術喺今季亦第一次使用,變化太大無疑都會令一眾年紀較輕既球員難以適從,相信就算係老大哥既韋利安第一次擔任前場中間位置亦唔多唔少會感到困惑。

林伯特今季的確喺今季好幾場賽時中作出即時既變化令球隊搶番唔少優勢,不過咁做難免令近日較為動盪既車路士增添更多不穩定性,尤其係哩支車路士仍然非常年輕,如果繼續難以保持穩定的話球員士氣上難免會跌入旋渦之中,到時林伯特同整隊既處境一定會更加危險。


文章發表時間 : 02/02/2019 10:20
文章最後更新時間 :2/02/2019 10:20

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→