淺談車路士陣中的西班牙大軍

藍獅 於 19/03/2017 發表 收藏文章
-請支持藍獅 Facebook專頁-

西班牙國家隊主帥盧柏迪古(Julen Lopetegui)公佈新一輪入選名單。除左當地本土球員外,英超亦有多名熟悉既面孔入選,而當中不乏車路士球員。在適應了343底下,球員去到西班牙國家隊定位有冇改變?一齊探討一下。

迪亞高哥斯達 (Diego Costa)
入選

盡管仲係喺馬德里體育會時期,都會發現哥斯達喺主打控球在腳既西班牙格格不入。在今季干地既調教下,哥斯達似乎搵番自己最好既狀態,同時亦都少左場上面無謂既火爆,雖然近期狀態稍有回落,但依然係球隊值得信任既頭號射手。盧柏迪古總算新官上任,會唔會為哥斯達打做球隊核心仍是未知之數,反觀佢拍莫拉達打雙箭頭或會令球迷更加期待。

柏度 (Pedro)
入選

久違既名字再次出現喺名單上。今季擔任球隊右翼鋒既柏度,可以話係如魚得水,助攻助守,亦令球迷見番當初喺巴塞隆拿熟悉既佢,咁既表現加上狀態火熱亦令柏度得到國家隊重新向佢招手。小弟預料佢會得到同球會一樣既位置,始終翼鋒先係佢最熟練既地方,如伙拍哥斯達可以話係將車路士既攻擊線搬上國際賽場上。

艾斯派古達 (César Azpilicueta)
入選

名單上當然唔少得佢,盡管球員本質為周身刀無張利,但球會或是國家隊也需要通天老倌,提升完整性以及領隊可更加靈活作人員配置。今季在343當中被安排右後衛位置,表現亦不需多講。番到國家隊,小弟認為如果唔係打三後衛既話,艾斯派古達會被安排先作後備,始終左右邊後衛有皇馬既卡華積以及巴塞既佐迪艾巴,因應戰術需要佢兩個既助攻力的確比艾斯派古達優勝。當然這場只係熱身賽,要看看盧柏迪古想帶咩新元素比西班牙了。
球員文章 : 有一種陽光男孩 叫AZP

法比加斯 (Cesc Fàbregas)
落選

或許車路士既343令法比落選了國家隊名單,始終球員今季主要被列作後備位置,去到近排先有正選機會,當然干地會以對手既打法去安排中場人手配置,即使法比後備上陣亦帶到應有既表現出黎,而盧柏迪古在記招中亦有表示有考慮到哩位車路士中場。的確在西班牙中場人才濟濟既情況下,主帥亦需要在經驗與新晉球員中作出取捨,哩個可以話係幸福既煩惱。

馬高斯阿朗素 (Marcos Alonso)
落選

喺球員未加盟車路士前可以話藉藉無名,從未為西班牙國家隊一隊上陣既馬高斯阿朗素,今季喺球會以左翼衛登場,表現稱職,加上有速度同擁有左腳罰球技能,好快吸引到球迷既注意。當然盧柏迪古亦有留意到此子。可惜在這位置,擁有名氣以及實力都高於阿朗素既佐迪艾巴。似乎佢要得到大國腳既第一頂喼帽,仲要付出更多努力去提升同突出獨有技能。
球員文章 : 讓世界懂得他名字 馬高斯阿朗素(上)

來源 :http://www.skysports.com/football/news/12024/10804859/chelseas-pedro-returns-to-spain-squad-but-no-marcos-alonso-or-cesc-febregas

藍獅 每週末出文 用心寫每篇文章 給我們一個Like作支持 : https://www.facebook.com/bluexlion/


如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→