《既然自稱是真巴黎人 倒不如轉投巴黎算 - 巴卡約高》

藍獅 於 27/07/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


休筆一段時間,去左日本睇車路士既季前熱身賽,藍軍黎到依一刻經已完成了四場友誼賽,相信林伯特都已經考察左大部份球員,來季戰術藍圖同人手配置亦有一定構思,而外界亦相繼傳出被放棄既球員名單,其中包括上季由AC米蘭外借回歸既中場球員巴卡約高,球員喺早一段時間都向媒體表示自己未來希望重回法甲效力巴黎聖日門,認為自己係一個不折不扣既真巴黎人,既然係咁倒不如依加就返去吧。

老實說巴卡約高並唔係一個好差既球員,當日時任主帥干地收購佢哩位法國中場返黎其實係想佢喺馬迪身邊慢慢成長,但估唔到球會一個屈尾十就放左後者去曼聯,變相就要對巴卡約高委以重任,但喺343之下球員並未能承擔馬迪所留下既職責,而352之中巴卡約高亦對自己既定位感到困惑,揠苗助長之下令法國人在場上犯下唔少嚴重失誤,更成為球迷既眾矢之的,最終干地下台後,球會亦隨即將巴卡約高外借到AC米蘭,希望佢能夠喺意甲重拾狀態。

法國人喺意大利可以話過左一個高山低谷既一季,先係有傳被時任主帥加度素打回頭,之後一步步成為球隊中既絕對主力,但佢同加度素之間既不咬弦都經已係公開既秘密,再加上侮辱對手、操練遲到、拒絕出場等等事件,巴卡約高最終沒有被AC米蘭所買斷,而同時球員亦未有喺過去哩一季嘗試改善自己既缺點,控球等壞習慣依然繼續出現,雖然巴卡約高自稱希望能夠喺林伯特手中取一席位,但佢轉個頭又同媒體表示自己係一個真巴黎人,其實都真係唔知哩位法國人想點。

再加上睇番哩四場熱身賽,都見到巴卡約高喺場上既表現明顯未合乎林伯特既要求,持球在腳時總係拖慢左成隊球隊節奏,回防時亦好鐘意喺對手背後踩腳式攔截,現場睇既畫面可以話相當危險,喺中場人手以及外籍球員過多之下相信球會會進行減磅,同時亦有傳巴黎聖日門總監李安納度有興趣將法國人以外借方式收歸旗下,前者正正係上季促成AC米蘭借用到巴卡約高既人物,所以兩者絕對有機會喺法甲再續前緣。

以球員既能力黎講,依加既英超並唔適合巴卡約高既發展,既然係咁的話倒不如早啲轉換環境,無疑對佢既職業生涯係會有正面幫助。

文章發表時間 : 27/7/2019 11:50
文章最後更新時間 : 27/7/2019 11:50

報導來源 :
Nizaar Kinsella (Chelsea Correspondent - Goal.com)

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→