《施治上神枱只屬降溫 瑪蓮娜將繼續獨攬大權》

BluexLion車迷手記 於 22/06/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


向來車路士都好願意比機會一啲過往效力過既球員喺退役後回歸史丹福橋擔任要職,前至宣傳大使後至訓練團成員都有,而今次施治擔任技術及表現顧問/指導(Technical and performance advisor)可以話係管理階級黎講係歷年來最高,但背後其實進一步確立左瑪蓮娜(Marina Granovskaia)喺控制球員轉會方面既權力。

自施治季中宣佈今季結束會退役後,一直有傳車路士高層有意提供行政職位比佢回巢,位置上正正係艾文拿路離開後既技術總監位置,自後者於前季轉投法甲摩納哥過後,球隊一直並未有重新招聘其職位,傳出過好幾個人選但都相繼於各自球會續約,而技術總監既職務亦全權交由別稱「西女人」既瑪蓮娜負責。

瑪蓮娜可以話係油王艾巴莫域治最信任既人,因為佢有能力為球會砌靚盤數,不過對於球迷黎講對前者既感覺大多數以反感居多,主要原因係「西女人」向來都係管數之人,睇住盤數當然喺錢方面會睇緊啲,亦因為咁好多時喺一啲球員買賣上都會同對方討價還價,對於瑪蓮娜黎講球員就好似一件貨物咁,賣出去既當然會為球會爭取最大收益,而買入黎既亦係會想以最平價完成收購,所以有唔少轉會目標都被其他球會高價收購而流失。

而艾文拿路與施治既職位的確存在差異,至少總監與顧問之間係權力上都經已不同,可以話進一步確立在瑪蓮娜喺轉會事務上既決策大權,不過之前都有講到其實喺哩個位置上除左處理轉會之外仲有一個重要任務,就係要為主帥同瑪蓮娜之間既溝通取得平衡,亦都姐係可以話係兩者既「磨心」,自艾文拿路離開後見到大前任主帥干地與管理層關係決裂,可想言之哩個任務係幾咁重要。

施治可以話暫時為近日受多項負面消息困擾既車路增添一點正能量,亦同時為球迷對於近年管理層喺處理球會大小事務上既不滿降溫,雖然權力上被扣減,但相信球迷都會肯收貨暫時「袋住先」。


文章發表時間 : 22/06/2019 11:50
文章最後更新時間 : 22/06/2019 11:50

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  施治  瑪蓮娜  艾文拿路  

留言


請按此登錄後留言。未成為會員? 立即註冊
  • 車迷Z 於 22/06/2019 評論 NO. 1

    可以予以觀望嘅。畢竟未來兩個轉會窗有轉會禁令,瑪蓮娜再獨攬大權都做唔出太大嘅動作。而且施治作為performance advisor,兼之係前球員,對球員表現好壞容易有更準確嘅判斷。亦都一定程度上制衡左更衣室權力太大嘅現象。

快捷鍵:←
快捷鍵:→