《史上第一位炒油王魷魚既主帥 - 沙利》

藍獅 於 18/06/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


封筆接近兩個星期,雖然目標尚未達到,總要重新上路,那邊廂車路士以官方形式宣佈沙利離隊,而祖雲達斯隨即公佈意大利人將接任班馬軍團主帥一職,意味著沙利成為自艾巴莫域治入主後史上第一位自行賠錢離開既藍軍領隊,「匆匆的來 匆匆的去」,哩一句足以形容沙利哩一季英國之遊。

唔知大家仲記唔記得沙利上季既上任時間,其實當時車路士為左請哩位意大利人都經已花費左唔少,講梗既唔單止係時間同金錢上,當中更包括一筆轉會費喺收購舊部佐真奴身上,即使上任後季前準備既時間亦都唔多,有指選擇沙利係Marina Granovskaia既意思,亦因為咁所以喺季中一段動盪期間車迷都將茅頭直指「西女人」身上。

而以結果論黎講,歐霸盃冠軍、聯賽盃亞軍再加上重奪歐聯席位,哩份成績表其實點都值得再比多一季時間沙利,無論當中過程有幾咁唔好睇,比曼城大炒有幾咁難堪,簡迪與佐真奴之間既運用有幾大爭議都好,成績都擺在眼前,既然當初藍軍都花左唔少喺沙利身上,依加反而肯比佢賠錢走人,其實都真係幾摸不著頭腦。

沙利聲稱自己離開既原因係關係到家人、朋友以及想念意大利既生活,亦都姐係有啲所謂既「思鄉病」,其實講咩都係門面野,沙利離開既主因好大程度係關於得唔到球迷、球員同管理層之間既支持同歡心,後兩樣都唔需要多講,近年無幾多個領隊都可以得到哩兩方面,但喺球迷方面都有咁既現象就真係第一次見,試問有幾多個領隊會接受到自己喺主場都可以比番自己既球迷高呼問候,比著係你都教到無癮。

而同時間有意大利球會喺哩個時候招手,更重要既係一個環境配套比起依加什至之前更好既球會邀請你返去,即使你係唔係一個標準既「打工仔」,其實都相當之容易作出選擇。總括而言,沙利既離開,未必係車路士唔想留,而係喺依加哩個環境同氛圍底下,球迷意見走到兩極,強留佢亦未必係一個好選擇,倒不如比佢賠足錢就批準走人,而沙利方面自己點諗?呼之欲出啦。

雖然「沙利波」未為英超帶黎革命性改變,不過點講都好沙利都唔係一個差領隊,只能夠話時機同環境未必適合,點都值得球迷尊重。


文章發表時間 : 18/06/2019 12:00
文章最後更新時間 : 18/06/2019 12:00

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  沙利  祖雲達斯  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→