《新班主入主 高層大變天 你如何評價瑪蓮娜近十年的功與過?》

BluexLion車迷手記 於 22/06/2022 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


隨著艾巴莫域治既離開,當日油王手下最為得力既瑪蓮娜(Marina Granovskaia)亦將會離開車路士,連同球會主席巴克(Bruce Buck)轉任為高級顧問,車路士既管理層將會以全新面貌示人;瑪蓮娜由2013年上任至今,經歷近十年既歲月是功大於過?還是犯錯連連?可以為大家淺評一下。

對於筆者黎講,瑪蓮娜可以話係一個令人又愛又恨既角色,佢並無太多關於足球既背景,純係一個生意人睇數為主,佢當然以「盤數」收支平衡為最終目標,好既一面係會幫到球會整靚條數過得人,而唔好果方面就當然係會影響到唔少球員既轉會操作,買入一啲未必係主教練心水既球員,加上佢係老細安排落黎既人,權力什至大過體育同技術總監,亦令唔少教練最終都選擇離開史丹福橋。


而每間球會都會有一個技術總監既角色,負責處理球會轉會同買賣,但車路士對上一個技術總監叫艾文拿路(Michael Emenalo),自2017年離開藍軍後其位置就一直懸空,施治即使加入管理層亦並非以其身份任職,令瑪蓮娜既權力就更加強大,除左管數之外更負責埋為球員定價、出價收購出售球員等交易事宜,基本上教練要買一個新球員都要得到佢首肯,而且仲要啱價佢先至會幫你買。

當然睇番車路士既薪酬架構,的確無乜過度大牌既球員出現,全隊最高薪都只係得簡迪一人,並未有失衡出現,而好似潛力新星夏維斯等天價交易最終都能夠以低於傳出價錢而成交,同時喺商業效益層面瑪蓮娜都成功為藍軍開拓出唔少收益,由球衣贊助商再到商業開發,車路士近哩十年黎喺哩方面一直都有著向上突破既發展。


球迷對於瑪蓮娜既離開相信都有唔少意見,最為著重莫過於佢對球員轉會方面既處理,認為佢既離開係會令球會再進一步,亦有人認為若非有瑪蓮娜睇住盤數,相信喺強大競爭再加上近年受疫情所影響之下,球會未必能夠仲係喺哩個位置繼續保持,唔知你點睇呢?

祝願佢之後發展一切順利,他朝有日史丹福橋再見。


文章發表時間 : 22/6/2022 13:00
文章最後更新時間 : 22/6/2022 13:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  瑪蓮娜  艾巴莫域治  油王  

留言


請按此登錄後留言。未成為會員? 立即註冊
    快捷鍵:←
    快捷鍵:→