《放棄收購觀迪 選擇相信自家青訓小將 他的名字叫查禾查路巴》

藍獅 於 12/11/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


上週車路士官方正式宣布與後防小將查禾查路巴續約多4年半,球員將至少留效球隊直到2026年,亦係喺基斯甸臣以及魯迪加等多位後防重將尚未動筆續約之前首位簽新約既防守球員,可見得球會對佢既未來係非常重視,其實今個夏天藍軍一直都同西維爾中堅觀迪(Jules Koundé)有連繫,最終轉會告吹而杜曹選擇相信哩位自家青訓小將,都為唔少球迷帶黎驚喜。

查禾查路巴自8歲起加入車路士青訓系統,唔知大家仲記唔記得喺干地執教時期仲有另一位同樣叫查路巴 - Nathaniel Chalobah就正正係佢哥哥,不過睇番依加既發展似乎係細佬查禾查路巴既生涯比較順利,同其他青訓球員一樣先經歷外借英冠球隊既生涯,先後外借至葉士域治以及哈德斯菲爾德,直到上季獲得到出國機會,法甲球會羅連安特願意以外借方式為球員提供一個試煉場地,而球員亦不付眾望好快成為左陣中既正選中堅,最終喺整個賽季於法甲一共上陣左29場賽事,並交出2入球2助攻,以年輕小將加上首次出國就係咁既成績,算係相當唔錯。

今季季前再一次喺季前返回史丹福橋,經過一個賽季之後主帥人選亦變成杜曹,後者願意比一眾外借兵以及青訓小將們參與季前集訓時間,希望佢地能夠透過訓練時段連同熱身賽去表現自己爭取留隊機會,而查禾查路巴亦延續火熱狀態表現得相當亮眼,即使後防人手充裕都吸引得到杜曹既目光,同時喺機緣巧合之下球會無法收購觀迪,據報係西維爾最後時刻臨時變卦要求提升轉會費金額,變相令查禾查路巴得到留隊機會。

相比於對上一位後防青訓小將已轉投AC米蘭既湯姆利(Fikayo Tomori),查禾查路巴除左同時具備速度之外,佢比起湯姆利喺處理一啲防守攔截同出腳時機更為細節,米9既身高擁有先天優勢身高手長,再加上具備一定既長傳視野,有好幾下穿透性既傳送依然都歷歷在目,今季至今喺聯賽11場賽事之中已經正選上陣5場後備1場,亦都交出左2個入球,絕對無辜負杜曹對佢既信任。

近日有傳如果西維爾依然企硬提升轉會的話,車路士就無意再喺冬季轉會窗重啟收購觀迪既行動,相信即使之後再傳有關藍軍連繫新中堅既傳言時,都可能只係為魯迪加離隊鋪路居多,查禾查路巴喺陣中既地位經已被確立,再加上難得仲有幾位老大哥好似堤亞高施華在陣,相信佢喺訓練同場上應戰都獲益不少...

努力喇後生仔,未來仲大把世界等住你。


文章發表時間 : 12/11/2021 11:15
文章最後更新時間 : 12/11/2021 11:15

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  查禾查路巴  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→