《路夫斯捷克的生涯二次拯救計劃 杜曹能否拯救其職業生涯?》

藍獅 於 25/10/2021 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


不經不覺路夫斯捷克都已經二十有五,由當日出道被睇好既藍橋中場小伙子,到重傷過後一直無法尋回昔日狀態,就連師弟們蒙特、列斯占士等都經已晉身一隊正選之列,自己既職業生涯就仍然停滯不前,直到早前對陣修咸頓時終於再一次為車路士於聯賽正選上陣,表現一致備受讚賞,今季能否在杜曹手上拯救自己既職業生涯?相信無論結果係點都好都哩個亦都將會係最後機會。

路夫斯捷克可以話係藍軍青春風暴中既第一代成員,同屆既隊友好似蘇蘭基、查路巴以及艾基等人早已相繼離開,反而當時既「龍虎切」喺外借到水晶宮一季學有所成之後獲得留隊機會,被時任主帥沙利所賞識重用得到唔少上陣時間,而佢亦不負眾望交出相當具說服力既表現,哩位英格蘭中場集合控球、推進、速度以及技術於一身,能夠利用個人技巧以一敵數進行持球突破,亦善於與隊友作小組配合,再加上身材高大,可以話係一名相當全能既中場球員。

正當以為一切都順風順水之時,當季季尾一場友誼賽卻令路夫斯捷克遭受到一次非常嚴重既傷患,繼而休養左接近一整個賽季既時間,球員復出後主教練亦由沙利轉為林伯特執教,後者喺球員狀態尚未恢復之下貿然將佢嘗試放喺一個輔鋒位置,喺路夫斯捷克明顯對於新位置存在不適應加上身體條件唔許可底下亦交出相當不堪入目既表現,但同時亦都睇到無論喺速度同對抗性方面,抑或心理狀態上佢五五波都未必敢於去盡,果次既大傷可以話由內至外都對球員有一定程度既打擊,而球員最終亦喺轉會窗完結前再一次以借用身份離開藍橋,租借到同巿球會富咸。

上年喺富咸既一個賽季,上陣31場就只能交出一個入球,表現當然未如理想,最終球會亦無法脫離降班區今季需要落入英冠作賽,而球員亦重回史丹福橋參與季前集訓,一去一回之後主教練一職又再一次轉換為杜曹,後者多次於季前集訓點名評論路夫斯捷克,認為佢擁有既天賦同能力係可以得到更高成就,只要放下過去既回憶著眼於依一刻做好自己,可見得杜曹對於哩位英格蘭人係相當器重及抱有期望,不過佢同時亦有批評路夫斯捷克喺防守方面既投入度不足,哩一點都係過往曾經有份執教過領隊都異口同聲所講過既野。

開季至今杜曹都嘗試一步步為「龍虎切」投入上陣時間,由後備上陣去到本土杯賽擁有打足全場既機會,希望球員逐步融入戰術體系同拿捏比賽節奏,直到早前對修咸頓至正式安排佢喺聯賽打正選,更交出一個助攻為球隊取得勝仗,而前晚對諾域治既賽事亦有後備上陣同時亦有一個助攻協助蒙特完成帽子戲法;以依加既中場人腳黎講,路夫斯捷克既競爭當然比起過去兩季大,尤其喺借用到沙奧尼古斯以及巴克利同時留隊之下,再加上簡迪、佐真奴同高華錫擁有既核心地位,不過喺特質上英格蘭人的確係有一啲唔同既元素係其他球員所缺乏,包括係小範圍技術盤扭連同前插入禁區起腳,都能令球隊喺中場支援前場下得到更大既變化空間從而提升進攻手段,而杜曹亦似乎偏好佢作為佐真奴既替補。
由摩連奴提拔上一隊發展,繼而得到沙利賞識獲得留隊機會再喺三中場之中獲得一個輪換位置,正當以為職業生涯可以到達高峰之時可惜又一次遭受傷患令生涯發展停滯,今日重新喺杜曹手上再次得到拯救機會,或許哩啲叫天意弄人,不過一眾車迷們都依然希望見到路夫斯捷克能夠重拾昔日光境。


文章發表時間 : 25/10/2021 19:00
文章最後更新時間 : 25/10/2021 19:00

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  路夫斯捷克  杜曹  

留言


請按此登錄後留言。未成為會員? 立即註冊
    快捷鍵:←
    快捷鍵:→