《收購薛耶治及添姆雲拿過後 淺談林伯特腹稿剩餘的目標》

藍獅 於 21/06/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


解禁後既車路士動作頻頻,繼二月公佈阿積士翼鋒薛耶治來季加盟後,日前傳出既另一收購目標RB萊比錫前鋒添姆雲拿亦正式成為下季一員,雖然今季賽事尚未完成,不過相信都足以為唔少車路士球迷帶黎未來憧憬,而除左哩兩人之外,外界傳出林伯特既腹稿之中亦有剩餘既目標球員希望得到,今集將會探討一下佢心目中既理想藍圖。

左閘位置定必係餘下落黎位置既首選,李斯特城既捷維爾(Ben Chilwell)亦係當中傳得最熱烘既目標,而喺早前既文章《左閘人選勢將替換 一閘難求下捷維爾屬真命天子?》亦有交待有關睇中捷維爾既原因,相信雙方喺球員既定價上會成為哩單交易中既最大阻力,而車路士方面亦有後備人選作替補,薛耶治隊友泰利亞費高(Nicolás Tagliafico)會係藍軍喺左閘位置上既次選,當然一切都要留待捷維爾既轉會交易告終至能定斷。

而喺前鋒、翼鋒以及左閘哩三個首要處理既位置過後,中堅位置亦係一個需要改善既地方,雖然並未必要喺黎緊哩個轉會窗動手,不過如果喺收購新左閘上遇上障礙,又或者有餘下轉會費之下,收購新中堅亦未尚不可,喺今季基斯甸臣經已証明左自己並唔係一名適合打英超既中堅,而蘇馬及湯姆利交出既表現亦未能說服球迷,一直都有傳林伯特希望收購新中堅去改善陣中防守,而早前一度傳出歐聯分組賽同組對手里爾中堅加比爾馬加希斯(Gabriel Magalhães)會係潛在目標,不過近期經已成為過氣消息,未知之後會否再度重燃。

令人意外既係除左中堅位置外,外界傳得較為熱烘既更有利華古遜既新星夏弗斯(Kai Havertz),哩名德國新星近年黎成為歐洲球壇中最為注目既潛力新星之一,夏弗斯可以話係一名前場多面手,除左攻中外亦能以右翼或者近期擔任既箭頭角色上陣,雖然能力同潛質上經已獲得一貫認可,不過車路士係攻擊位置上經已存在奧岱、佩利錫、蒙特等唔少年輕球員,貿然再黎多個夏弗斯定必會再度攤分上陣時間,個人認為倒不如將哩部份既轉會費先行處理中堅位置會更為合適。

雖然未知黎緊所預計既轉會能唔能夠發生,不過薛耶治以及添姆雲拿哩兩單轉會經已成功製造驚喜,同時立即為球隊注入即戰力,亦為球迷們對於上一個轉會窗零操作先行降溫,動作上既進取性睇得出林伯特同球會所展示既野心,不過都要喺餘下賽程確保到有前四位置至可以再進一步吸引潛在人選加盟。


文章發表時間 : 21/06/2020 11:05
文章最後更新時間 : 21/06/2020 11:05

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  林伯特  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→