《把握力就是勝負分野 歐霸盃決賽後感》

藍獅 於 30/05/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


黎到倫敦雙雄今季最後一戰,雖然戲碼依舊卻需遠征巴庫,最終車路士以4:1大勝阿仙奴,亦係繼1314賽季後再一次舉起「霸氣盃」,如果你係中立球迷純用觀賞性去睇哩場波的話,唔計你自己本身攰以眼訓的話其實場波係幾好睇,互有攻守,而雙方把握力就成為左勝負既關鍵。

老實說,以哩個比數作結其實係有少少大跌眼鏡,就算係車迷都估唔到能夠以大比數擊敗對手,論戰意同決心,阿仙奴一方理應略高一籌,因為如果輸波的話,下季就再一次同歐聯席位擦身而過,而車路士方面季尾亂打亂撞之下以聯賽季軍衝線鎖定歐聯資格,哩場波可以算話「風流波」,再加上歐盃盃亦稱為「艾瑪利盃」,而沙利雖然執教已久但從未喺歐洲賽事上一嘗奪冠滋味,雙方賽前分野明顯。

開賽初段其實阿仙奴比唔少壓力車路士,兩邊翼衛多番前插嘗試拉開藍軍陣式,透過傳中喺禁區製造混亂,感覺上車路士好似面對緊兩季前干地所帶領既「自己」咁,藍軍好多時都要大腳傳上前場解圍,盡可能避開中場對抗,不過隨住時間過去,阿仙奴喺體力上既消耗減弱左佢地所施加既壓力,令車路士慢慢主導番比賽形勢,加上今場藍軍既傳球質素可以話係今季黎講算係比較高水準既一場,其實上半場完結果陣都開始見到入波只係時間問題。

今季兩隊波其實有同樣問題,就係喺下半場一出更衣室果下既時間同樣係最唔集中,失波亦好容易喺哩段時間出現,唔知係沙利喺半場時段調整,定係球員突然發奮,車路士喺下半場一出黎就洶湧而上,唔洗廿分鐘經已入左三球,短時間造成失波根本令阿仙奴全隊都失去方向,雖然今場雙方射門次數係不相伯仲,車路士 14次阿仙奴16次,不過前者有8腳中龍而後者就只有2下,阿仙奴後防失色既表現埋下大敗伏線,而施治既表情動作亦令唔少車迷心情忐忑。

同樣既最後一戰,但夏薩特同卡希爾與施治之間既送別可以話有「天與地」之分,結果論黎講沙利第一季為車路士帶領歐霸盃冠軍、聯賽盃亞軍以及英超季軍,其實都真係無乜野可以挑剔,如果身為車迷既你都仲係唔滿意的話,建議你都係買隻FM自己教好過。


文章發表時間 : 30/5/2019 14:45
文章最後更新時間 : 30/5/2019 14:45

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  沙利  阿仙奴  艾瑪利  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→