《「我是中場 不是翼鋒」 - 美臣蒙特》

藍獅 於 04/11/2020 發表 收藏文章
《原創文章 歡迎轉載 請列明出處 謝謝》
-請支持Bluexlion車迷手記 Facebook專頁-


一名球員能夠勝任多個位置當然係好事,變相令主教練喺賽前排陣以及臨場調動上得到更多變換空間,但並唔係全部球員都適合於其他位置發揮,總會因應踢球風格同特質之下有自己最擅長既崗位,就好似近年車路士新寵兒既美臣蒙特亦都一樣,雖然位置上的確可以同時勝任中場同翼鋒兩個角色,但由近期連場賽事都睇得到佢並唔係可以長期擔任翼鋒既材料,林伯特實在有必要為球員重新定位。

自林伯特上季正式以主教練身份執教車路士後,蒙特就成為左球隊既重要一員,為本身高華錫、簡迪以及佐真奴哩個三中場組合注入年輕活力,同時帶黎以往缺乏既助攻元素,的確收錄得唔錯既成效,球員上季雖然亦有間唔中客串翼鋒角色,不過以一整季黎睇都主要以擔任中場球員為多,但由本季開季至今,蒙特就被主力安排於翼鋒位置發揮,直到最近對般尼既賽事中至係今季首次以中場角色出現,而兩個位置上既表現分野亦相當明顯。

先從球員特質同元素作分析,雖然蒙特喺好多最後一傳同射以及細節上處理仍然相當幼嫰,而能力同技術水平亦唔算得上好好,不過佢既跑動覆蓋面可以話相當之大,再加上球員風格相當爛打,能夠緊纏對手一段唔短既距離,而喺反搶成功後亦可以立即長驅直進到前場助攻,相比起上季初球員每到賽事下半段經已喘氣,球員明顯有加以訓練體能作改善令自己能夠維持九十分鐘輸出,感覺上的確類似注入左林伯特球員年代既「鐵人」元素,亦變相成為左一個偏向前場發展既工兵。

但建基於哩啲特質底下,係並無助於佢喺另一位置上既發揮,翼鋒較為著重速度、個人突破以及傳球質素作為主力賣點,但蒙特喺哩三方面既能力並唔算得上突出,更可以用平庸黎形容,老實講實在睇唔到派佢上場擔任翼鋒既主要原因,而喺後備席上有正統翼鋒可用既情況下,難免令人覺得林伯特喺用人上有偏袒之嫌,為左令到蒙特可以出場而出,大於實際球隊戰術上既考量。

尤其喺上場對般尼將蒙特重新放回中場後,與早前連場翼鋒既表現成強烈對比,依加經已踏入十一月頭,其實要嘗試既野都差唔多試晒,係時候要切實確立一個慣常陣形作為賽季大方向,始終變化太多實在難以讓球員適應。


文章發表時間 : 04/11/2019 12:45
文章最後更新時間 : 04/11/2019 12:45

《原創文章 歡迎轉載 請列明出處 謝謝》
Bluexlion車迷手記 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  美臣蒙特  林伯特  

留言


請按此登錄後留言。未成為會員? 立即註冊
    快捷鍵:←
    快捷鍵:→