干地在英超的第一份成績表

藍獅 於 29/06/2017 發表 收藏文章
-請支持藍獅 Facebook專頁-
<原創文章 歡迎轉載 請列明出處 謝謝>

初到貴境既干地,就成功帶領早一季一沉不起既車路士重奪聯賽冠軍,可以話令球迷們喜出望外之餘同時亦都係超額完成。然而每一位名帥本身都係有優點亦有弊病,當然干地都唔會例外,一齊回顧一下意大利人喺英超既第一份成績表,睇下你又會比佢幾多分?
.圖片來源 : Sky Sports

經歷過前季一輪動盪,球員既整體士氣無可否認一定唔係處於一個良好水平,唔單止係咁,球隊本身亦都存在左好多問題,要修理一架破舊不堪既「爛車」,絕非一件容易既事。在季前引援既五名球員當中,相信只有馬高斯阿朗素及大衛雷斯係干地所要求的,而以結果論來說,哩兩單收購得出黎既效果比起球迷季初所想的成相反,可以話非常成功,更令外界相信干地既買人眼光。(註:球會原先收購同是巴黎聖日門既馬昆奴斯 因對方無意放售而轉移至回購大衛雷斯)
.圖片來源 : ChelseaFC.News

在戰術方面,開季時干地只將馬迪既位置推前,防中轉為簡迪,但明顯地球隊整體亦走不出早一季既陰影,患得患失、老鼠拉龜既依舊情況出現,只係純有運氣之神眷顧既情況下季初才贏到好幾場波。直至到輸比利物浦同阿仙奴後,更一度傳出干地被炒既消息,當然最後只是炒作新聞,但無可否認亦令球迷驚嚇過度。意大利人隨即轉陣至343,新陣式無論在攻守方面都較為全面,用當時既人腳得出最大既效益,完全能達到限米煮限飯既效果,而最大得益者係激活番柏度同埋復活番夏薩特,兩者都能自由地專心在前場負責推進製造攻勢。無疑干地在季前準備同計劃戰術方面應記一功。
.圖片來源 : Daily Express

而喺人手配置方面,由於車路士只需應付英格蘭國內賽事,干地選擇放走一啲功能不合意既球員,包括老臣子米基爾、副隊長伊雲奴域同奧斯卡。騰出既空間好就讓一批年青球員上位,查路巴經歷好幾季外借後終於得到一隊上陣機會,而路斯夫捷克被干地改造為前線攻擊手,效果亦比以往喺中場發展為佳,繼後既仲有艾拿同回收番黎既艾基,後者潛力絕對能夠喺未來既後防穩佔一席。雖然每位年青球員上陣時間唔算長,但至少比歷任領隊較多機會上場,亦令外借既年青球員未感太過絕望,至少望一望摩西斯令人感到希望,球員天賦唔高但勝在夠賣力,最終佢既努力得到回報成為球隊正選。
.圖片來源 : Squawka

但係干地都有唔少弊病係需要來季改進,喺臨場調動方面意大利一貫作風都係太慢,好多時喺半場落後或悶局階段,根本收唔到佢想要既效果時,都無迅速作出相對應既戰術安排,可能會話後備席上根本唔夠其它類型既球員比佢作調配,但係有時佢既調動真係令人摸不著頭腦,尤其係喺足總盃決賽,球隊在落後兼打少個既情況下竟然喺八十多分鐘換走前線表現最好既迪亞高哥斯達換入巴舒亞伊,此舉絕對令人費解,而喺決賽階段第一次喺英格蘭遇上自己球員領紅被逐,臨場安排上明顯有不足之處。
.圖片來源 : ESPN FC

過份重用馬迪亦令不少車路士球迷感到疑惑,戰術優先還是狀態優先,相信係干地同球迷互持己見既地方,馬迪喺下半季既表現的確每放愈下,喺場上隱形尤如打少個,而干地依然堅持法比加斯後備上陣作變奏之用,雖然最終能夠成功奪得聯賽冠軍,但干地絕對需要在來季為馬迪既定位下一番苦功,後者與簡迪同場延伸既問題開始進一步擴大。(註:有傳曼聯領隊摩連奴有意收購舊部馬迪到奧脫福)

而迪亞高哥斯達相信係最令意大利人頭痛既地方,無可否認小弟曾經認為干地喺祖雲達斯搞得掂一個思鄉病既泰維斯,區區一個哥斯達相信唔會咁麻煩,但事實並非如此。西班人今季的確明顯喺將場上「嘢火」既一面收歛左,但係佢同干地既心病一直都存在,季尾後更因為一個短信而搞出火,哥斯達離開車路士相信只係時間問題,但在處理手法上干地亦有不當既地方喺度。
.圖片來源 : Sports News XL

意大利人喺英超渡過既第一季已經順利結束,而車路士既歷史話比我地聽,只要主帥奪冠,未來既路將會更加難行。干地亦唔係一個「老派」既教練,相信佢會繼續改進自己,同時希望佢能夠打破過往既宿命。

我覺得干地今季既表現有八十分,你又會比佢幾多分呢?

<原創文章 歡迎轉載 請列明出處 謝謝>
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  干地  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→