將士用命 - 車路士重現久違的鐵血精神

BluexLion車迷手記 於 22/10/2017 發表 收藏文章
-請支持藍獅 Facebook專頁-
《原創文章 歡迎轉載 請列明出處 謝謝》

沉晚黃金時段上演左一場觀賞價值極高既賽事,車路士喺領先既情況上被對手反超前,但足球既奧妙之處就係完場雞聲未響,乜野都可能發生,最終藍軍喺主場以4比2擊敗屈福特,終止聯賽連敗以及3場賽事不勝記錄,史丹福橋再次重現久違的鐵血精神。
.圖片來源 : Football365

賽前干地將應戰陣式變番做343,當中兩位先前確定受傷既球員,大衛雷斯以及巴卡約高亦在正選名單當中,相信係負傷上陣,而賽前預計體力充沛會為首發既魯迪加接替艾斯派古達出任右後衛,後者被調到右翼衛,前線方面出番柏度,與莫拉達及夏薩特為攻堅,除左後場之外其它位置既安排都算係理想合適。
.圖片來源 : talkSPORT

去到11分鐘,夏薩特喺右路傳比禁區外既柏度,由於過多紅衫作客球員囤積在禁區中,柏度選擇直接起腳抽射,結果皮球橫越空中直飛死角撞柱破網,車路士就以一球世界波先開記錄,其實今場柏度既表演都非常搶鏡,可能由於之前三場波包括對陣曼城同羅馬既賽事都被列後備,今場重奪正選就必定全力以赴大顯身價。
.圖片來源 : Goal.com

其實車路士喺開記錄後一直都繼續爭取入球機會,15分鐘,莫拉達二傳比法比加斯,後者選用笠射希望能夠收死出迎既高美斯,可惜力度實在太細經已被門將接實;屈福特先以防守為重點,事先安排大量球員在自己中後場位置,除左車路士反擊攻勢之外,都好難製造到空間進入對手禁區,導致球隊主要以遠射攻門,及後柏度、大衛雷斯同法比加斯都施加遠射,可惜都偏離目標或被沒收。
.圖片來源 : Reuters UK

而屈福特一稍有機會就會透過邊路進行反擊,去到上半場加時2分鐘,紅衫球員一次右路界外球攻勢,將皮球直接掉入車路士禁區製造混亂,杜哥利混戰中大力抽射近柱入網,代表著車路士再一次不能以不失姿態番入更衣室,對於氣勢黎講無疑係一大打擊。
.圖片來源 : Daily Mirror

半場休息出番黎之後,車路士先壓住屈福特黎打一段,但莫拉達及柏度都不能再為藍軍增添入球,反而屈福特既反擊更具威脅,要不是李察利臣半空門情況下射斜其實藍軍早以落後,一波未平一波又起,巴卡約高被對手從後偷襲得走,屈福特單係兩三名球員就弄得車路士整個防線混亂起來,佩雷拉輕鬆面對古圖爾斯射入成反超前。
.圖片來源 : Read Chelsea

其實之後仲有一球屈福特右路傳中,大衛雷斯漏頂結果落入到李察利臣,可惜佢又再一次把握唔到破門機會;由於莫拉達多次被對手侵犯,干地喺60分鐘選擇換入巴舒亞伊去加強番前線硬度,並相繼換入韋利安接替馬高斯阿朗素,將艾斯派古達調為左翼衛,柏度為右翼衛伙拍韋利安喺右路配合進攻,果然喺71分鐘收到成效,韋利安引到對手後傳比邊路無人看管既柏度,西班牙人望準後長傳入禁區,由巴舒亞伊頂入追成平手。
.圖片來源 : Twitter

之後見到大衛雷斯都出現受傷情況,更與加利卡希爾撞埋一齊,但手上仲有一個換人名額既干地並沒有換入基斯甸臣既意思,而屈福特就繼續利用速度爆破尋找機會。互有攻守之下其實巴舒亞伊都有兩個埋門機會,可惜都射唔中目標,而干地喺86分鐘將最後一個名額換入助攻力強既薩柏哥斯達入替柏度,同樣在一分鐘後又得出同一個效果。
.圖片來源 : Daily Mirror

複製上一個入球方程式由薩柏哥斯達比邊路既韋利安,今次長傳入禁區巴舒亞伊頂唔到,反而比後面上黎協助攻門既艾斯派古達頂到,入球後副隊長立即拍打及親吻球衣上既車路士會徽,同時好耐未見過干地衝去攬住住球迷慶祝,話口未完補時階段再有巴舒亞伊埋齋,最終球隊反勝4比2完場。
.圖片來源 : Watford Observer

除左協助入球既艾斯派古達,以及兩位後備奇兵巴舒亞伊及韋利安表現出色外,致勝關鍵必定係干地既調動,雖然喺首發既名單中存在問題,但臨場都以攻代守既調動去令球隊反勝,3分固然重要,但比球迷見得到藍軍久違了既鐵血精神,全隊拼命打出一場好波更為重要!

Come on Chelsea!

文章最後更新時間 : 22/10/2017 11:55

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/
標籤: 車路士  干地  屈福特  

留言


請按此登錄後留言。未成為會員? 立即註冊
  • 數據就是事實 於 22/10/2017 評論 NO. 1

    奇兵奇效!!
    但干地沒彎可轉,只能死攻...
    要是對手是強隊,下場可能相反!

  • Louis Tong 於 22/10/2017 評論 NO. 2

    有時卡希爾踢到好似自由後衛 可能係濕地嘅安排

快捷鍵:←
快捷鍵:→