《增添薛耶治過後 探討車路士在翼鋒位置上的版圖變化(下)》

藍獅 於 28/05/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


上回傳送門 : 《增添薛耶治過後 探討車路士在翼鋒位置上的版圖變化(上)》

喺奧岱以及佩利錫留隊既前題下,意味住喺翼鋒位置上至少有一位球員會離開而騰出空間比薛耶治,亦姐係會喺韋利安同柏度二擇其一,當然亦唔能夠排除球會會選擇收購多一名翼鋒,而最後兩位老將一齊無留隊哩個可能,在於球會角度,由始至終開季至今都係希望能夠留得底既係韋利安。

上回都有講到韋利安既向前推進特質暫時喺隊中無人替代到,而哩一點亦省卻左好多需要戰術層面上所構思既功夫,林伯特當然明白當中道理,所以由開季到依加都一直向外界表明希望球會能夠同到哩位巴西人續約既心跡,以韋利安既狀態,暫時睇落都至少仲有兩季貨仔賣,而球會亦的確開出兩年新合約比到佢,但奈何球員一口咬定要求三年,雙方各執一詞,亦似乎各自都無讓步空間,既然係咁的話唯有將韋利安定性為不在下季名單之中。

繼而到柏度,球會似乎亦未有任何想同球員續約既意思喺度,始終哩位前巴塞球員一直都唔喺林伯特既腹稿之中,只係咁岩去到季中喺翼鋒位置上有過多球員受傷,至令到柏度罕有地得到出場機會,而表現亦有目共睹,最終球會同林伯特會唔會因為咁而好似同基奧特一樣咁樣處理仍係未知之數,但如果球隊最終有兩位老將同一時間離開的話,無論喺場上或至更衣室內都有機會出現一定未知數。

以依加個趨勢車路士的確有機會會添致多一名翼鋒球員,而睇番外借緊既球員名單當中如堅尼地、摩西斯等人,亦暫時未睇到有適合既球員可用,至於大多數球迷所幻想既多蒙特翼鋒辛祖(Sancho),個人認為哩個人選較為不切實際,藍軍依加喺收購上唔可能再只因為一個位置而花費過量轉會金錢,就憑薛耶治既交易經已睇到球會依加喺操作出偏向以性價比作首要考慮,再加上喺排序上究竟將哩位新球員會定位於第幾出場位置,亦係佢本人會考量是否加盟既地方,而要喺以上因素下物色到有關球員亦絕非易事。

相信黎緊好快會有進一步消息得悉兩位老將既去向,而個人角度傾向韋利安選擇留隊續約兩年,再加入有關條款按第二季表現(上陣次數)而選擇性啟動延長續約多一年,既可以保障到雙方權益,亦係相對上球會較容易處理既操作,捨難取易,何樂而不為?


文章發表時間 : 28/05/2019 12:50
文章最後更新時間 : 28/05/2019 12:50

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  林伯特  韋利安  奧岱  佩利錫  柏度  薛耶治  

留言

會員
我要評論
請按此登錄後留言。未成為會員? 立即註冊
    快捷鍵:←
    快捷鍵:→