《前世界第一左閘艾殊利高爾宣佈退役 車路士黃金一代已成為歷史》

藍獅 於 20/08/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


如果你問我依加世界第一左閘係邊個,馬些路?阿歷斯辛度?喺哩個年代球迷反應未必一致,不過對上一名被公認左既世界第一左閘,相信都可以話非艾殊利高爾莫屬,自出道後喺英格蘭球壇打滾近十四年,長時間維持高競技水平,喺依加哩個年代都實在好難再出現到第二個。近日A高正式對外公佈退役消息,亦意味著車路士黃金一代成員經已全數退役,回顧番佢喺藍軍既生涯,絕對係一名歷史上既傳奇左閘人物。

艾殊利高爾出道於阿仙奴青年軍,少時曾經擔任前鋒一職,亦都因為咁佢既個人技術以及前插助攻能力都比一般閘位球員強,雖然身型上缺乏優勢,不過佢既速度同爆發力都可以話相當強勁,無論喺舊時定依加哩類型既閘位球員都特別吃香。A高喺效力阿仙奴期間亦為球隊贏得兩次英超冠軍以及三次足總杯冠軍,但始終未來更上一層樓喺歐洲賽場上一嚐冠軍之味,亦都因為咁令佢當時有離隊他投之念。

直到2006年,艾殊利高爾背著 「叛徒」之名轉投同市死敵車路士,自「油王」艾巴莫域治入主後藍軍一直以高薪招攬唔少具名氣以及實力既球員加盟,A高就係其中之一,其實喺醞釀轉會期間都早以被媒體揭發未經球會許可下與時任車路士領隊摩連奴會面,所以當時大部份阿仙奴球迷都對於哩單交易相當反感,亦因為咁每次作客酋長球場哩位英格蘭左閘都會被主場球迷「熱情招待」,不過以結果論黎講,艾殊利高爾喺車路士的確贏得更多。

轉投史丹福橋後,A高成為左車路士黃金一代陣容成員之一,伙拍杜奧巴、泰利、林伯特同施治,球迷們亦可以話見証到藍軍新皇朝既誕生,亦開始為球隊贏得一個又一個錦標,英超、聯賽盃、足總盃、社區盾,一攬所有本土盃賽奬項,而喺歐洲賽方面最受矚目當然係贏得歐聯冠軍,及後亦奪得過歐霸盃,只係差歐洲超級盃未能到手。而同時A高亦係英格蘭國家隊首席左閘,佢可以話係喺退出家隊之前果十年都係英格蘭既重要人物之一,亦令佢奠定左世界第一左閘之名。

隨著年紀佔大,A高亦開始慢慢淡出藍軍正選行列,喺2014年球季轉投意甲羅馬,及後亦到美職加盟洛杉磯銀河,直到上季中得到時任打比郡主帥林伯特既邀請,以自由身重回英格蘭球壇,可惜未能為球隊衝擊英超席位,喺升班附加賽決賽輸左比有泰利做助教既阿士東維拉,而完成半季合約後亦一直未有落班。喺早前車路士既日本季前熱身賽之中艾殊利高爾亦有以球會大使身份一同外訪,相信佢未來都會重回藍軍擔任要職。

見証黃金一代已成歷史,相信球迷們都會百感交集,不過對於哩班名宿黎講,其實係一個新開始,因為佢地將會以另一個身份繼續為球會同為球壇出一分力。


文章發表時間 : 20/08/2019 13:50
文章最後更新時間 : 20/08/2019 13:50

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  艾殊利高爾  阿仙奴  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→