《雖敗不辱 車路士超級盃賽後分析》

藍獅 於 18/08/2019 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-

今場林伯特以433陣式出戰 亦都係球隊上季源用開既陣式 自佢上任後熱身賽一直都係以4231作主要陣式用多 今場波反而用番433 背後亦目的相信亦都呼之欲出 以球隊依加既人腳配套 再加上球員上季都用左一整季時間去適應433 今場見到無論喺場面同配合上都能夠為哩隊車路士帶黎唔錯既表現

當然 並唔係話林伯特所用既4231唔能夠成功 正如當初沙利上任後都花左唔少時間去抺甩干地既三中堅 亦都因為陣式上一啲固有既防守漏洞令到球隊失球畫面不斷重複 既然林伯特喺哩場決賽都選擇番一個球隊熟習開既陣式 亦都姐係佢深明如果今季需要喺聯賽同歐聯既成績上有一定競爭力的話 就好大機會要繼續以433作陣式主要藍圖 而其他本土盃賽就作試練之用

好喇講返場波 同上季常規主力比較 今場波喺人腳上有幾個位置唔同左 分別安排左普利錫接替夏薩特打左邊 以及中堅兩個位由蘇馬同基斯甸臣所接替 其餘位置就無乜大變動 戰術內容都係跟上季一樣 主要依靠佐真奴發板 高華錫主要負責中路推進同入涉 而簡迪就繼續利用跑動覆蓋面處理球隊前中後問題 其他球員職責同大同小異

而今場波想重點講兩個球員 亦都會係今季黎講相當重要既球員黎 分別係柏度同簡迪 夏薩特離隊後 論個人技術最好既邊路球員可以話非柏度莫屬 雖然年紀上又大一年 不過西班牙人喺一啲個人特質上依然係球隊中所缺少 包括鬥心、協防頻率、跑位以及傳球時機 喺今場波完完全全活現左哩幾方面喺隊中就只有柏度能夠勝任 尤其係喺夏薩特離隊後今季就一定好依賴柏度喺場上既表現

至於簡迪 雖然傷患開始多 不過球員即使狀態未處於高水平仍然能夠交出高水平表現 而且喺一啲持球過人方面感覺上比上季做得更多 依加咁睇可以話係沙利釋放左佢既進攻本錢 雖則喺一啲最後一傳方面仲有啲美中不足 不過都足以成為當今球壇其中一位世界級全能中場

最後想講一講今場波既後防線 比起再上一場對曼聯 今場波後防線既表現其實相當穩定 基斯甸臣同蘇馬喺好多防守既處理上都做得唔錯 應清則清 而後者無被上場輸果個十二碼影響得到 今場波落腳同單擋方面都表現出信心 喺哩度想表達今季既中堅係咁多就係咁多 都幾已係鐵一般既事實 與其成日話佢兩個唔掂 倒不如比多啲支持佢地 最重要既係哩兩個球員一場打得比一場好 將自己所犯既錯修正得到 「交學費」就緊架喇 有邊個當打既中堅喺仲係年輕球員果陣未交個學費 只係依加既表現蓋過左自己既過去姐

總結 雖然今場波失落左相信係今季最接近既一個奬盃 不過球隊既精神面貌表達得出無因為被曼聯大炒而失落 而艾巴咸射失十二碼後隊友之間亦互相安慰 哩邊亦係林伯特所講球員需要團結一致既表現 而今場波亦留下433以及4231既伏線 相信林伯特會再作試驗 尋找最終定案

各位香港人 今日維園見!


文章發表時間 : 18/08/2019 10:15
文章最後更新時間 : 18/08/2019 10:15

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  超級盃  林伯特  利物浦  

留言


請按此登錄後留言。未成為會員? 立即註冊
    快捷鍵:←
    快捷鍵:→