《一季的藍橋生涯 短暫的歐冠過客 - 美利拉斯》

藍獅 於 19/04/2020 發表 收藏文章
《原創文章 歡迎轉載 請列明出處 謝謝》
-請支持藍獅 Facebook專頁-


美利拉斯,一名曾經效力過利物浦以及車路士兩支列強既中場球員,一身紋身造型加上特別髪型,令你除左留意佢喺場上球技之外亦會被獨有外型所吸引,可惜佢停留喺英超既時光並唔長,而最終亦喺車路士分別以歐聯冠軍以及足總盃冠軍作結送別英超之旅,一齊回顧一下哩位短暫既過客。

2011年夏天由利物浦轉投到車路士既美利拉斯,係果時繼費蘭度托利斯以及班拿約後第三位由晏菲路轉到史丹福橋既球員,似乎當時藍軍對於能夠攻破己方大門既紅軍球員特別情有獨鍾,而喺艾辛長期受到傷患所困擾底下,車路士喺中場位置既人手配置可以話非常有限,當中只有林伯特、拉美利斯以及米基爾三位常用主力同一班年青小將,無論喺戰術上定係輪換上都有需要增添多一名中場球員作補充,不過喺排位上當時既美利拉斯並非車路士既首選目標。

當時車路士既首選係設定為應屆能夠擊敗C朗拿度以及美斯既「金球奬」得主,仲效力緊熱刺既中場莫迪歷身上,藍軍一而再再而三咁不斷為克羅地亞人提升報價金額,但一一都被熱刺拒絕,堅拒放比同巿直接競爭對手,而由於時間緊迫,車路士不得不另尋目標,亦好快就傳出美利拉斯哩個名字,最終哩位葡萄牙中場以約1200萬英鎊登陸史丹福橋,球員喺轉會後指出當時收到報價後其實並不希望離開紅軍,似乎利物浦既決定成為左哩單轉會既關鍵。

喺踢法上美利拉斯可以話係一名相當之全面既中場球員,無論攻守方面表現都非常稱職,而且能夠擔任中場中路每個位置,主要取決於主教練戰術上既部署安排,而球員亦非常善於遠射得分,中目標準繩度相當高,只要個波落點係喺接近禁區頂位置既佢腳下,幾乎每次起腳都能夠命中目標,而自佢同林伯特離開後車路士既中場球員普遍遠射能力欠奉,實在難免令人懷念。

葡萄牙人同當時車路士新上任主帥韋拿斯保亞斯(André Villas-Boas)曾經喺波圖短暫合作,雙方互相都有一定認識,亦令到好快成為藍軍中場既絕對主力,不過經過一輪動盪後,保亞斯黯然落台由迪馬堤奧(Di Matteo)走馬上任,美利拉斯亦成為左輪換球員。而喺歐聯準決賽被判罰一面黃牌,導致佢不能夠喺安聯球場既決賽上陣,可以話非常可惜,不過最終美利拉斯都能夠為球隊贏得歐冠以及足總盃兩座奬盃,為佢既職業生涯增添兩個具份量既奬盃。


文章發表時間 : 19/04/2019 11:15
文章最後更新時間 : 19/04/2019 11:15

《原創文章 歡迎轉載 請列明出處 謝謝》
藍獅 每週出文 用心寫每篇文章 給我們一個Like作支持 : https://www.facebook.com/bluexlion/

如果喜歡我們的文章,請即分享到︰

標籤: 車路士  利物浦  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→